Qinersiartortut amerlassusaat allannguuteqarpallaarsimanngilaq
Nalunaaqutaq aqqanernut Qaanami qinersisartut 17,5 procentii taasiartorsimapput. qinersinermut kingullermut sanilliullugu ikinnerulaartut, illoqarfimmi qinersisitsut ilaata oqaatigaa.
Ilulissani qinersineq soqutigineqarluannguatsiarpoq. Tassami qinersisartut 15,6 procentii nalunaaqutaq aqqanernut taasiartorsimapput, 2007-mi 9,7-it taasiartorsimasut.
Aasianni nalunaaqutaq aqqanernut inuit 278-it qinersiartorsimapput tamannalumi naammaginartuuvoq.
Nunatsinni qinersiviit annersaanni Nuumi 11.827-nik qinersisartoqartumi nalunaaqutaq aqqanernut 1053-it imaluunniit qinersisartut 8,9 procentii taasiartorsimapput
Qaqortumi nalunaaqutaq aqqanernut taasiartortut amerlassusaat 13,44 procentiupput, 2007-mi Folketingimut qinersinermi 13,99 procentiusimallutik taamaattumillu allannguuteqarpallaarsimanatik.
Nuna tamakkerlugu qinersiviit unnummut arfineq-pingasup tungaanut ammatinneqassapput.
Qinersinermi inerniviusup saqqummiunneqarnissaata pinissaa ilimagineqarpoq unnuap qeqqata missaani pissasoq.
Danmarkimi qinersisartut qinersivinnukaalluartut oqaatigineqarpoq. Ritzau-ip apersuinerata ersersippaa 2007-mi qinersinermut sanilliullugu qinersineq peqataaffigineqarluarnerusoq.
Danmarkimi nalunaaqutaq marlunut qallunaat qinersisinnaasut 38 procentii qinersiartoreersimapput, 2007-imi 34,4 procentiusimalluni.