Qinersiartortut 2002-mut naleqqiullugu amerlanerusut taasiartorsimapput

novembarip 15-at 2005 11:09

Qinersisinnaasut 39.000-it tungaannut ullumikkut amerlassuseqarput, maannamullu qanoq amerlatigisut taasereersimanersut ulloqeqqata siorna paasiniaratsigu paasivarput, Inatsisartunut qinersinermut 2002-mut pisumut naleqqiullugu maannamut suli amerlanerusut taasiartorsimasut.

Qeqertarsuarmi, Qasigiannguani, Aasianni, Maniitsumi Nanortalimmi Narsamilu ulloqeqqata siornatigut taasiartorsimasut Inatsisartunut qinersinermut 2002-mut naleqqiullugu amerlanerulaarsimapput.

Assersuutigalugu Sisimiuni nalunaaqutaq aqqanermut taasisinnaasut 3658-iupput, taakkunannga procentinngorlugu 13,11 %-it taasisimapput, ukioq 2002-imut naleqqiullutik amerlanerulaarlutik.

Aamma Tasiilami taasiartorsimasut siornatigumut naleqqiullugu ikinnerusimapput, taasisinnaasut katillugit 1124-ullutik. 2002-mi 9,98 %-it taasiartorsimasut ukioq manna taamaalinerani amerlerialaarsimapput, tamatumuuna 14,94 %-it taasereersimallutik.

- Silaqqinnera innuttaasut atorluarsimagunarpaat, aammali naalakkersuisunngortitsinissaq pillugu qineqqusaartut pissangatitsilaavinnerat pissutaaqataagunarluni maannamut taasiartortoqarluarsimavoq, qinersinermi suleqataasoq Anders Pivat nassuiaavoq.

Illoqarfiilli tamarmik taama ingerlasimanngillat, illoqarfiit ilaanni taasiartorsimasut siornatigumut naleqqiullugu ikinnerulaarsimammata. Paamiuni Kangaatsiamilu taasiartorsimasut siornatigumut naleqqiullutik ikinnerusimapput.

Uummannami taasisinnaasut 877-iupput, taakkunannga 107-t nalunaaqutaq aqqanermut taasereersimapput procentinngorlugu 12,3, kingullermik inatsisartunut qinersinermi 2002-imi taasiartorsimasut amerlanerulaarsimapput, taamani 18,76 %-iusimallutik.

- Ullumikkut silagissorsuugatta angalaarfigilluta, tamanna taasiartortut 2002-mut naleqqiullugu ikinnerunerannut pissutaaqataagunarpoq. Qinersisitsisoq Andrea Løvstrøm nassuiaavoq.