Qinerseriaaseq misissuiffigitikkusuppaa

Nunatsinni qinerseriaaseq Inatsisartunut ilaasortap, Inuit Ataqatigiinneersup, Naaja Nathanielsenip, misissuiffigitikkusuppaa. Maannakkut qinerseriaaserput innuttaasut ilaannik inuit tamat oqartussaanerannut sinniisuutitaqartitsinera iluaqutaanersoq Inatsisartut ukiaanerani ataatsimiinnissaanni Naaja Nathanielsenip taamaalilluni oqaluuserisassanngortippaa.
Allattoq Carla Davidsen
aggustip 24-at 2011 13:59

Nunatsinni Inatsisartunut qinersisarneq qinersivinnut arfineq-pingasunut siusinnerusukkut agguataagaasimagaluarpoq, tamannali 1998-imi allanngortinneqarpoq, qinersivik ataasiinnanngortinneqarluni. Tunngavilersuutigineqarpoq qinikkap qinersisartuni aggerfinnilu kisiat sullikkunnaarlugit nuna tamakkerlugu qinikkatut sullisissagaa. Atuagagdliutini ullumi saqqummersuni tamanna allaaserineqarpoq.

- Inatsisartut sumi najugaqartuuneri misissuataaraanni, Inatsisartuni Naalakkersuisunilu ilaasortat 16-it Nuummi najugaqartut takuneqarsinnaavoq, sinneri illoqarfinni allani najugaqartuullutik. Ilaatigut aamma takuneqarsinnaavoq Qaanaarmiut Qeqertarsuarmiullu Inatsisartuni sinniisuutitaqanngitsut, Naaja Nathanielsen Atuagagdliutinut oqarpoq.

- Paasissutissat tunngavigalugit ukiuni kingullerni apeqqutaasarsimasut pillugit oqallittoqarpat tunngavissaqarluarnerussaaq, oqarpoq.

Ilaatigut aamma paaserusuppaa innuttaasut ilaat Inatsisartuni ikippallaanik sinniisoqartitsinnginnersut, tamannami oqaluuserineqartaannarmat - soorlu aamma ukiut aalajangersimasut tunngavigalugit sinniisoqartitsineq oqaluuserineqartartoq, aalajangersimasunik inuussutissarsiutillit arnaaneq angutaanerluunniit tunngavigalugu sinniisoqartitsineq aamma oqaluuserineqartarput, Naaja Nathanielsen erseqqissaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq