Qinerseqqusipput
Jørgen Wæver Johansenip Naalakkersuisutut tunuarnera Siumup iluani avissaartuuttoqarneranik ersarissumik takutitsimmat, illuatungiliuttut isumaqarput inatsisartunut qinersinissap tungaanut Naalakkersuisoqarfik Naalakkersuisup siullittaasuanit akisussaaffik tiguneqarallartariaqartoq, Atassutillu siulittaasuat Augusta Sallinng isumaqarpoq ikerinnarmi inatsisartunut qinersisoqartariaqartoq.
- Naalakkersuisuusut taamannak avissaartuuttumik partiiat inissisimanera suliassat ingerlanneqarneranut toqqissimanganngilaq, taamaammat uagut isumaqarpugut qinersisoqartariaqartoq, Augusta Salling oqarpoq.
Aamma Demokraatini siulittaasoq Per Berthelsen isumaqarpoq Siumup partiiani avissaartuunneq ersarippallaartoq.
- Isumaqarpunga Jørgen Wæverip tunuarnerata takutikkaa, siumup Hans Enoksen-mit siuttuuffigineqarluni ingerlanneqarnera ajorluinnartoq. Jørgen Wæver Johansenip tunuarnera tupaallaatiginngilarput, taamaaliorneratami takutiinnarpaa Siumup iluani ingerlatsineq ajorluinnartoq. Taama oqarpoq Demokraatit siuttuat Per Berthelsen.
