Qinerseqqittoqassanersoq suli qulakkeerneqanngilaq
Afghanistanimi præsidentissamik nutaamik qinerseqqittoqassanersoq suli nalunarallarpoq.Afghanistanimi præsidenti Hamid Karzai qinersinermi siullermi ajugaasutut suaarutigineqassappat, 50 procentinit qinerneqarnissamik piumasaqaat angusussaagaluarpai, Hamid Karzailli tamanna angusimanngikkaa, Naalagaaffiit Peqatigiit sinnerlugit misissueqqissaartartut tuluit tv-qarfissuannut BBC-mut ullumi taama nalunaaruteqarput.
Allattoq Mads Lynge
oktobarip 19-at 2009 14:42
Karzai 50 procentinit qinerneqarsimanngippat Afghanistanimi qinerseqqittoqartariaqassaaq. Nunap tunngaviusumik inatsisaa naapertorlugu taamaaliortoqartariaqassaaq.
Maannamut inerneriugallartut takutikkaluarpaat Karzai aggustip 20-ani qinersinermi 54,6 procentinit qinerneqarsimasoq, qinersinermik nakkutilliisoq amerikaminngaanneersoq ullumi oqarpoq Karzai 48 procentinit qinerneqarsimasoq.
Taamaassimassappat nutaamik qinersisoqartariaqassaaq, qinerseqqittoqassanersorlu qinersinermik aqutsisut aalajangertussaavaat.
Qinersinermi peqquserluttuliortoqarsimasoq, qinersinermik alaatsinaattut oqaatigaat. Qinersiviit katillutik 7000-iupput, qinersiviillu peqquserluttuliorfigineqarsimasut 210-unerarneqarlutik.
