Qinerseqqinneq Sisimiormiut ajorinngilaat
Sisimiuni kommunalbestyrelsemut ullumi qinerseqqittoqarmat kingullermik qinersinerminngaanniit qinersiartortut amerlanerulaarnerat, kommunalbestyrelsemut qinigaasussanut pissangatitsivoq.
Apriilip tallimaani kommunalbestyrelsemut Sisimiuni qinersineq qinersinermi ataatsimiititaliamit pingasunngormat atortussaajunnaartutut aalajangerneqarmat ullumi qinerseqqittoqarpoq. Malik Berthelsen minillugu qinigassanngortittut tamarmik qinigassanngorteqqipput.
Apriilip tallimaani qinersinermi Siumut arfineq-marlunnik isertitaqarpoq, Atassut, Demokraatit, Inuit Ataqatigiillu tamarmik marlunnik isertitaqartut.
Sisimiut TV-ianit oqaatigineqarpoq pingasunngornermi qinerseqqinnissamik aalajangiussinerup kingorna Sisimiuni qineqqusaartoqaqqissimanngitsoq, taamaallaalli partiit radiokkut ussassaaruteqaannartartut.
Qinerseqqinnerli ullumi ingerlanneqarmat Sisimiormiut kingullermik qinersinermut naleqqiullugu amerlanerulaartut maluginiarsimallugu borgmesteri Hermann Berthelsen radioaviisimut nalunaaqutaq pingasut missaani oqaloqatigigatsinni oqarpoq.
Sisimiuni partiit katersortarfiup silataani nipilersorlutillu kaagillertarput assigiingitsunillu pilerisaarutinik tuniniaapput. Nalunaaqutarlu pingasut qaangilaara maluginiarpaa qinersiartortut pisarnermit 100-t missaannik amerlanerusut, Siumumit qinisagassanngortittoq Hermann Berthelsen ualiartoq oqarpoq. Hermann Berthelsenip qinersinermi inernerusoq paaseqaartsinnagu annerusumik oqaaseqarusunngilaq.
Qinerseqqinnissamik aalajangiisoqarnerani iluarisimaarinnittoq Demokraatineersoq Palle Christiansen oqarpoq nammineq aamma maluginiarsimallugu qinersiartortut amerlanerusut.
- Inuit qinerseqqinnissaminnut akuersaarlutillu soqutiginnilluarput, qinersiartortullu pisarnermit amerlanerupput, pissanganassaarlu kommunalbestyrelsemut isertussat qanoq inissisimalissanersut Demokraatineersoq Palle Christiansen oqarpoq, kommunalbestyrelsemilu issialersussat pisarnermit aamma allaanerujumaartut.
Sisimiut kommuneani pisortap naatsorsuutigaa qinerseqqinnermut aningaasartuutit katillugit 40.000 koruunit missaaniittut.
