Qineqqusaartut mattunneqarallalerput
Inatsisartunut qinersinissamut atatillugu qinigassanngortittunik, radiokkut TV-kkullu aallakaatitat nalinginnaasut eqqarsaatigalugit peqataaqqusiunnaartoqarallassaaq, tamannalu oktobarip 25-niit novembarip 15-ianni qinersinerup naammassereernerata tungaanut sivisussuseqassaaq.
-KNR-mi sulisunut maleruagassiinermi pingaartissimavara, qineqqusaartut assigiimmik tamarmik pineqarnissaat. Piffissami aalajangersimasumi oktobarip 25-ianiit qinersinissap tungaanut assigiinngitsutigut mattussigallartariaqassaagut, KNR-ip pisortaanera Lars Lennert Sandgreen oqarpoq.
Maleruagassami ilaatigut allaqqavoq KNR-mi sulisut partiit ilisarititsinerinut oqaluttutut ilaaqqusaanngitsut.
Qineqqusaartut KNR aqqutigalugu nalinginnaasumik aallakaatitassiatigut immiussatigut saqqummersitatigullu saqqumilaartinneqarnikkut mattunneqarallassasut Lars Lennert Sandgreen oqarpoq.
Inatsisartuni ilaasortat qinikkatut sulinermik saniatigut Radio-kkut TV-kkullu assigiinngitsutigut saqqumilaaruteqartutut ilisimasagut tassaapput: Georg Olsen, KNR-mi aallakaatitassiortuusimasoq, nipilersukkanillu CD Liima Inui aqqutigalugu saqqummersitsisimasoq, Jonathan Motzfeldt, palasi. tussiusiortoq taalliortorlu, naalagiartitsinerisa ilaat aallakaatinneqartarput, taalliai tussiusiaalu atorneqartarlutik, Per Berthelsen nipilersoqatigiinni Sumikkunni aamma Qaakkunni nipilersoqataasartoq, taalliortuulluni erinniortuullunilu. Kuupik Kleist CD-mik ”Samma Samma Paffa Paffa”-mik saqqummersitseqataasoq, CD-ip imaasa ilai taalliarai erinniaralugillu.
Isak Davidsen, palasi, erinniortoq, taalliortoq, erinarsoqatigiinnik siulersuisartoq, suliai erinarsoqatigiit Noqartikkut erinarsortoralugit CD-nngorlugit aamma saqqummersinneqarnikuupput. Kiisalu Lars-Emil Johansen, taalliortoq nutsugiartartorlu, erinarsuusiai nipilersugaalu aamma saqqummersinneqarnikuupput. Takussavarpullu qinigassanngortittut nutaat akornanni taama allatigut aamma saqqumilaartoqassanersoq.
