Nittartakkatigut tusagassiivik "Greenland Movement" nalunngiliuk? 

Nalugukku tamanna Inatsisartunut qineqqusaarnerup naammassiartornerani aatsaat pilersinneqarneranik pissuteqarsinnaavoq.

Maannali nittartagaq nutarterneqarnera peqqutaalluni iserfigineqarsinnaanngilaq. Taamaakkaluartoq videot immiussallu nittartakkameersut YouTubekkut inoqatinullu attaveqaatitigut allatigut suli takuneqarsinnaapput.  

Tusagassiorfiit allat nittartagaq allanngortinneqannginnerani takunissaa angumeraat. Taakkununnga ilaavoq danskit nittartakkatigut tusagassiorfiat, Tjekdet.dk, tassannga Greenland Movementimik kikkut ingerlatsisuunersut paasiniarneqaraluarpoq, tamannami nittartakkami saqquminngilaq.

Tjekdet.dk naapertorlugu nittartakkami tassani Naleqqami qineqqusaartut taamaallaat sammineqarput, tassanilu Qupanuk Olsen aamma Kuno Fencker apersorneqarnerannik ilaatigut ikkussisoqarsimavoq. 

USA-p sinniisoqarfianeersoq apersuisoq 

Podcastini immikkoortut ilaanni Najannguaq Hegelund apersuisuuvoq, taannalu Nuummi amerikamiut sinniisoqarfianni atorfeqarpoq.  

Tjekdet.dk-p aamma danskit aviisiata Politikkenip taanna oqaaseqartinniaraluarpaat iluatsinngitsumilli.

Nuummi amerikamiut sinniisoqarfianeersup oqaaseqartartua, Najannguaq Hegelundip Greenland Movementimut ilaanera sinniisoqarfimmut attuumassuteqanngitsoq Tjek.dk-mut allappoq. 

Læs ogsåInatsisartutvalg: Over dobbelt så mange mænd på stemmesedlerne 

- Najannguaq Hegelund amerikamiut sinniisoqarfia amerikamiullu naalagaaffiat sinnerlugit podcastimi peqataanngilaq. Nammineq piumassutsiminik peqataavoq. Amerikamiut sinniisoqarfianni sulisut, allatulli inuttut namminneerlutik oqaaseqarsinnaatitaapput, sinniisoqarfik allappoq.  

Amerikamiut præsidentiata Trumpip nunarput pillugu oqaaseqarnera Nuummi Sisimiunilu inuppassuarnit arfininngornermi akerliussutsimik takutitsissutigineqarpoq.  

Illoqarfiit pingaarnersaanni akerliussutsimik takutitsineq amerikamiut sinniisoqarfiata silataani naammassineqarpoq. Tassanilu amerikamiut erfalasuat peerneqarsimavoq, aamma sinniisoqarfimmit aamma sinniisoqarfiup inissisimaffianit, tassa amerikamiut Danmarkimi aallartitaqarfiannit sinniisoqarfiup akerliussutsimik takutitsineq pillugu oqaaseqarusuttoqanngilaq.

Neriniartarfiutilik Qarsoq Høegh-Damilu ikiuupput 

Greenland Movement “ammasumik assigiinngisitaartumillu oqalliffimmik pilersitsinissaq siunertarineqarluni pilersinneqarluni” tusagassiorfik Tjekdet-mut allappoq.

- Isiginnittariaatsinut assigiinngitsunut inissaqartitserusulluta, taamatuttaaq inuiaqatigiinnut tunngassutilinnik siammasissumik oqallissinnaanissaq inissaqartikkusullugu suliniuteqarpugut, taakku Tjekdet-mut allapput. 

Læs også Aki-Matilda Høegh-Dam melder sig ind i Naleraq 

Sushinik neriniartarfimmik Nekomik piginnittoq, Aviaq Louise Kleist atsiortuuvoq. Greenland Movementimiillu podcastit ilaat tassani immiunneqarpoq.

Taannali Naleqqamut attuumassuteqarnani podcastinilli immiussinermi inimik atortitsiinnarluni Tjekdet-mut allappoq,.  

Greenland Movementip videotaata ilaanni Qarsoq Høegh-Dam, Aki-Matilda Høegh-Damip Naleqqameersup qatanngutaa, namminerlu politikkeriunikoq apersuisuuvoq.  

Taassumali Naleqqami qineqqusaartut qanoq atassuteqarfiginerai nittartakkami takuneqarsinnaanngilaq.