Sulinermik Inuussutissarsiuteqartut Kattuffiat SIK Inatsisartunut qineqqusaartoqalerpat ilaasortaminut periarfissiivoq qineqqusaartunik naapisitsinissaminik.
SIK-p partiit tamaasa peqataatitaqaqqullugit marlunngornermi novemberip arfineq-pingajuanni Nuummi Katuamut qaaqquai.
- Aatsaat misililerparput Inatsisartunut qinersilernermi qinersisartunik ataatsimiisitsissalluta, kisianni kommunemut qinersinermi assingusumik aaqqissuisimavugut, SIK-mi siulittaasoq Jess G. Berthelsen oqarpoq, nangipporlu:
- Ilaasortatta piareersarluarlutik takkunnissaat kissaatigaarput, inuit ilaasortaanngitsut isissagaluarpata ajorpallaarnavianngikkaluarpoq, kisianni ilaasortagut salliutillugit taamatut aaqqissuussivugut, oqarpoq.
Taamatuttaaq SIK-p isumaliutigaa, unnuup ingerlanissaa aliikkusersuinermik ilaqartinneqarumaassanersoq.