Qineqqusaarnissaq angallannikkut pissutsinit mattussaaqqavoq

Qalliinnarlugu Naalakkersuisut Kommunillu Kattuffiata suleqatigiisitaliai 22-t paasissutissanik piffissaq eqqorlugu tunniussinngitsoormata qineqqusaarutissat ilaannakoortut atorneqartussanngorput.
marsip 20-at 2008 16:10

Kommunalbestyrelsenut nutaanut qinersinissaq partinut qineqqusaartunullu imaannaanngitsunik atugaqartitsilerpoq. Naalakkersuisut Kommunillu kattuffiat siorna 22-nik suleqatigiisitaliorput, kommuninut qinersinissaq sioqqullugu saqqummiussisussanik. Saqqummiussisoqanngimmalli qineqqusaarutissat ilaannakoortunngorput, taakkuinnaanngillalli aamma angallannermi akit angisummik akimmisaartitsipput. Kattusseqatigiit partiiata siulittaasua Anton Frederiksen oqarpoq:

Påskip nalerimmagu angalaniarnikkut pissutsit imaannaanngereeqisut ajornarneruleqqasut aamma pissartanngorniunnerit Avannaatalu qimussersua ingerlanneqartussaammata. Anton Frederiksen aamma oqarpoq ajoraluarmik qineqqusaarutissat naatsorsuutigisamit ilaannakuunerusariaqartut paasissutissat tamakkiisut pineqanngitsooramata. –Ajuusaarnaqaaq suleqatigiisitaliat suliaminnik piffissaq eqqorlugu tunniussinngitsoormata, Anton Frederiksen oqarpoq nangipporlu: tamatuma takutiinnarpaa nuna tamakkerlugu naalakkersuisut pilersaarusiornerluppallaarut.

Naalakkersuisut siulittaasuat Hans Enoksen oqarpoq suleqatigiisitaliat pineqartut ulluni makkunanerpiaq suliassatik suliarigaat erseqqissarpaalu kommunit tigusassaat killilersorniarneqanngimmata. – Uninngatitsiniartoqanngilaq torersumilli suliarisariaqarmta kingusinaalaartoqarpoq, Hans Enoksen oqarpoq.