Sapaatit-akunneri tallimangajaat qaangiuppata qinersivinnukaassaagut.

Politikerilli qineqqusaaqqaarallassapput. Qineqqusaarnermi ulluinnarni ajornartorsiutit qitutinneqassasut amerlanernit kissaatigineqarpoq.

Tassa Sisimiuni innuttaasunit pingaarnertut oqariartuutigineqartoq.

Inuiaqatigiinnut tulluarsakkamik namminerisatsinnik politikkeqartariaqartugut, Maasinnguaq Brandt isumaqarpoq. Assi © : Sisimiut TV

- Innuttaasut kalaallit aallaavigineqarnissaat kissaatigisorujussuuara, uku imatuunngitsoq; danmarkimigooq, islandimigooq imaapput. Kalaallinut tulluarsaanerit, Maasinnguaq Brandt oqarpoq.

Nunanik allanik qanoq isumaqatiginninniarsinnaanersugut, Anthon Jensenip tusarfiginerorusuppaa. Assi © : Sisimiut TV

- Tusarusunnarput inuit atugaat aammalu avammut niueqatigiinnissaq, nunanik allanik isumaqatigiinniarnissaq, Anton Jensen oqarpoq.

Ulluinnarni ajornartorsiutit iluarsineqartariaqartut, Ivinnguaq Rønning isumaqarpoq. Assi © : Sisimiut TV

- Massakkut inuunitsinni atukkagut sumiluunniit aaqqitassat, nioqqutissanut tunngasinnaapput, kommuneqarfinnulluunniit tunngasinnaapput sullissinermi, utoqqarnut, inuusuttunut inersimasunullu, Ivinnguaq Rønning isumaqarpoq.

Vittus Karlsen nunatsinni pisut pillugit soqutiginnippoq. Assi © : Sisimiut TV

- Massakkumut ingerlateriigaat taakku tusaqqikkusuppakka ilumut pissusissaq imaluunniit pilersaarut malillugit ingerlanersut, taanna pingaartippara tusarnissaa, Vitus Karlsen oqarpoq.

Aalisakkat akiisa eqqartorneqarnissaat pingaaruteqartuusoq, Akisooq Olsen isumaqarpoq. Assi © : Sisimiut TV

Nunatsinni aalisakkap akia eqqartugassatut pingaaruteqarpoq. Aalisakkamummi akigitinneqartoq suli appasillunilu nikerarpoq, taamaattumik akigititat pitsaanerulernissaat qulakkeertariaqarpoq.

Qineqqusaarnermi qulequttat suujumaassanersut piffissap takutikkumaarpaa. Qulakkeerneqareersorli tassaavoq: Marsip aqqarnganni innuttaasut qinersissapput.