Assi: Kommuneqarfik Sermersooq

Voxpop Qineqqusaarneq torinngitsoq

Qineqqusaarnerit torernerusinnaagaluartut qinersisartut arlallit KNR-ip Godthånshalimi Nuummiittumi naapitai isumaqarput.

Qinersiviit unnugu nalunaaqutaq 20:00 matuppata, qinersinermit inernerit politikerit utaqqiinnarsinnaanngussavaat. 

Politikerit qaammammi matumani oqallittaqattaareerlutik innuttaasunillu ataatsimiisitsisareerlutik qineqqusaarnerat tassa naammassissaaq. 

Pitsaanerusumilli qineqqusaarsinnaagaluartut Nuummi illorsuarmi timersortarfimmi qinersiartortut arlaqartut KNR-imit ulloqeqqannginnerani oqaloqatigineqartut isumaqarput.

Kusanaatsumik imaqanngitsumillu qineqqusaartoqartoq Lone Hindby isumaqarpoq. Politikerit kommuninik qanoq pitsanngorsaanissamut erseqqissumik nassuiaateqarnissaat taassuma kissaatigisimagaluarpaa.

- Imminnut saassuttaqattaarnatik, nunamilu tamarmi politikkimut tunngasunik oqaluuserisaqarnatik. Aamma piviusunik misissuinerunissaat kissaatigigaluarpara, Lone Hindby taama kissaateqarpoq.

Aamma Lasarus Mikaelsenip qineqqusaarnermi akerleriittoqartarnera malugaa.

- Taamaapporaasiit akersuutilaartarneri soorunami qinersinerit tamaasa taamaattuaannarput, immaqa malinnaavallaartarani qasunalaassapput, kisianni malinnaajuaannartuulluni naliginnaavoq taanna takussaajuaannartoq, Lasarus Mikaelsen oqarpoq.

Sara Reimerilli politikerit assortuunnerat maluginiarpallaanngilaa. Kusanartumik qineqqusaartoqartoq taanna isumaqarpoq.

- Kusanartorujussuarmik qineqqusaarutigivaat, meerannguit, inuusuttut, utoqqaat aammalu inersimasut. Tamakkua qineqqusaarutigineqarneri nuannaarutaasorujussuupput, Sara Reimer taama oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl