Qineqqusaarneq toqqaannartumik KNR.gl-kkut
Marsip aqqaneq-aappaanni qinersinissamut atatillugu qineqqusaarneq siulleq TV-kkut Radiokkullu aallakaatinneqartussaq unnugu aallakaatinneqassaaq. Ilulissani Timersortarfimmi taanna pissaaq, partiit tamarmik marlukkaarlutik peqataatitaqartassapput, tassa kalaallisut aallakaatitsinermi marluk, qallunaatut aallakaatitsinermi aamma marluk, peqataassapput.
Qineqqusaarneq nalunaaqutaq arfineq-pingasut qeqqaniit qulingiluat qaangerlugu tanneq pingasut tungaanut kalaallisut siullermik aallakaatinneqassaaq. Taava holdit tullii qallunaatut qulit qeqqaniit qineqqusaassapput. Taakku marluk KNR Radiukkut toqqaannartumik aamma aallakaatinneqassapput. Nipitaa aamma KNR.gl-mi toqqaannartumik tusaaneqarsinnaavoq tuugassaq 'Radio tusarnaaruk' toorlugu.
Tusarnaariat qinigassanngortittunut apeqquteqarsinnaanerisa saniatigut, isiginnaartut tusarnaartullu oqallinnermi Facebook aqqutigalugu apeqquteqarsinnaassapput.
Qinigassanngortittunut Facebookikkut maanna apeqquteqartoqarsinnaalereerpoq.
Qineqqusaarluni ataatsimiinnerit nalaani apeqqutit tamakkua ilaat toqqarneqartut, qineqqusaartunut saqqummiunneqartassapput.
Apeqqutit uunga nassiunneqartassapput: facebook.com/qinersineq.
Tassa Ilulissani unnugu qineqqusaartoqassaaq, Sisimiunilu sisamanngorpat. Qaqortumit kingullertullu Nuummit sapaatip-akunnerata tulliani qineqqusaartoqassaaq.
