Qineqqusaarneq KNR TV-mi ima malinnaaffigiuk
Nutaatullu qinersinermi matumani Narsaq tikinneqartussaavoq. KNR Narsami qinersisartunik annertunngikkaluartumik novembarip tallimaani ataatsimiititsiniarpoq. Nuummi qinersisartunik ataatsimiititsinissaq novembarip 23-ani pissaaq. Qinersisartunik ataatsimiititsinerni sammisat aalajangersimasut qaqinneqartassapput, innuttaasunik apersuisoqartarluni aammalu Facebookkikkut ataatsimiiitsinermilu peqataasunit apeqquteqartoqartassalluni.
Sammisat aalajangersimasut pillugit oqallinnerit aamma akioriissitsinerit
KNR ukiormanna nutaarluinnartut aalajangerpoq partiit ataasiakkaarlutik ilisarititsissuteqartarnerat kingornalu oqallittoqartarnera atorunnaarlugu sammisat aalajangersimasut aallaavigalugit partiinit tamanit peqataaffigineqartumik oqallitsitsinerit tallimat ingerlanneqassasut. Ima paasillugu, unnuit oqalliffiusut tallimat tamarmik sammisamik aalajangersimasumik sammisaqarfiussapput. Oqallitsitsinerit KNR-ip qinersinermi aallakaatitsivianit ulluni novembarip 12-iani, 13-iani, 14-iani, 17-iani 18-ianilu toqqaannartumik aallakaatinneqassapput.
- Taakku ilisaritinnissaat assut qilanaarivarput. Taamatut aaqqissuussinitsigut sammisat ataasiakkaat itinerusumik sammineqarsinnaassasoraagut peqatigisaanillu politikerit tigussaasunik akissuteqartinnissaannut piffissaqanerussasoraluta. Oqallitsitsinerni tamani sammisat assigiinngitsut iluanni immikkut ilisimasalinnik suliatigullu ilisimasalinnik pulaartoqartassaagut, taakkulu ajornartorsiutaasinnaasut pillugit politikerit akissutissarsiffigerusutaannut akissutissarsiornermi ikiortassavaatigut, KNR-imi nutaarsiassanut pisortaq, Mikkel Bjarnø Lund, taama oqarpoq.
Qineqqusaarnermi nutaatut aamma akioriissitsisassaagut. Partiit marluk siulittaasui akioriissillugit oqallitsittassavagut. Akioriissitsilluni oqallitsitsinerit taakku ulluni novembarip 20-ani, 21-ani 24-anilu pissapput.
Qineqqusaarneq inissaqartinneqartariaqarpoq
KNR-ip qineqqusaarnermut atatillugu aallaakatitassianik taama amerlatigisunik aallakaatitsinissaa aallakaatitassianut allanut sunniuteqassaaq. Oqaatigineqareersutut, Qulaarpaa sisamanngorpat aallakaatitseqqaarnermi kingorna unikkallassaaq, tallimanngornermilu aliikkutassiatut aallakaatitassiarput nuannarineqarluartoq Tallimanngorneq Unnuppaat Man oktobarip 17-iani aallakaatinneqareeruni decembarip tallimaata tungaanut unikkallassaaq.
Hans Jukkup aliikkutassiamik aallakaatitassiaa Piggappaat qineqqussaarnerup ingerlanerani ingerlaannassaaq.
