Qimuttut pillugit akerliussutsimik takutitsipput

februaarip 07-at 2007 07:21

Qimuttut naalliutsinneqartarneri akueriumanagit, norgemi innuttaasut danskit aallartitaqarfiata silataani akerliussutsimik takutitsisut, folketingimi politikkerit aamma tupaallassimaqaat.

- Uumassusillit taamatut pineqartarneri akuersaarneqarsinnaanngilaq, Dansk folkepartiimi uumasut inuulluarnissaat pillugit oqaaseqartinneqartartoq, Christian H.Hansen taama oqarpoq.

Kalaallit Nunaani qimuttut kigutai kaattamik kaallugit piiarneqartarput, qimussit aqqutaani ajoqusersimallutik qimaannarneqartarput, qiullutillu aamma perlertartut ekstra bladet taama allaaserisaqarpoq.

Christian H. Hansen-ip suliaq maanna folketingimut ingerlateqqinnialerpaa, namminersornerullutillu oqartussat nassuiaateqartariaqartut taanna isumaqarpoq.

- Bloktilskudinik amerlaqisunik tunniussisarpugut, qimmillu naalliutsinneqartut isiginngitsuusaarneqarsinnaanngillat, Christian H.Hansen, dansk folkepartiimeersoq taama oqarpoq.

Inatsisinik atuutsitsinermut naalakkersuisoq Lene Espersen oqarpoq kalaallit nunaanni naalakkersuinermut akuliunniarnani, naatsorsuutigaali naalakkersuisut iliuuseqarniarumaartut.

Naalakkersuisuni ilaasortaq Sivert K Heilmann Ekstrabladimut neriorsuilluni oqarpoq, uumasut nakorsaat, qimuttut atugaat pillugit nassuiaateqarlutik nalunaarusiornissaannik piumaffigineqassasut, taassumalu kingorna iliuusissamik aaqqissuisoqarnissaa pissasoq, naalakkersuisoq Ekstrablademut oqarpoq.