Qimuttut naalliutsinneqartarnerat Naalakkersuisut akuersaanngilaat

Qimmit qimuttut naalliutsinneqartarnerat toqunneqaannartarnerallu Inuussutissarsiornermut Naalakkersuisup Siverth K. Heilmannip akuerisinnaanngilaa.

Kalaallit Nunaanni Qimussertartut Katttuffiata pisortat iliuuseqarnissamik neriorsuutaat utaqqiinnarai ullaaq tusarparput. Paasissutissat Naalakkersuisoqarfiup ingerlateqqinngitsoorsimasai Kattuffimmut nassiukkini, Siverth K. Heilmann oqarpoq. Siullermilli ulluni kingullerni tusakkat ima oqaaseqarfigeqqaarpai.

- Qimminik toqutsisoqartarsimaneranik oqariartuuteqartoqarnera tusagassiuutit aqqutigalugit tusaasara soorunami ajuusaarnarpoq. Naatsorsuutigaara taamatut pisoqartarsimaneranik politiinut apuussisoqartarsimassasoq, taakkumi suliassaq suliassarivaat, oqarpoq nangilluni.

- Qimussertartut Katuffiallu marsip 26-iani Qasiginnguani qimussersuaqarnerani ataatsimeeqateqarsimavugut, aammalu siunnerfeqarsimavugut eqaannerusumik suleriaaseqartoqartariaqalersoq, Siverth K. Heilmann oqarpoq.

Tassani eqqarsaatigineqarput Qimussertartut Kattuffiata pisortaqarfiullu akornanni aammalu uumasut nakorsaata suliaanut atatillugu pitsaanerusumik eqaannerusumillu suleqatigiinnissaq.

- Siunnerfigut taakku sulissutigalugit ingerlappagut, massakkut ataatsimiissimanermi imaqarniliaasimasut ullumikkorpiaq akueralugu saqqummiunneqartoq Qimussertartut Kattuffiata siulittaasuanut ingerlateqqittussaassavara, nassuiaavoq.

Iliuusissatulli ukioq pilersaarusiaq tamanut saqqummiunneqarnikuusoq kattuffimmut apuunneqarsimanngilaq.

- Immaqa kukkussutigisara annerpaasimagunarpoq uani Qimussertartut Kattuffiannut toqqaannartumik atorfilittatta nassiutinngitsoorsimagamikku, manna nassiuttussanngorpara, erseqqissaavoq.

- Iliuusissatut pilersaarummi qimminik paarsinerlunnermik oqaluttoqartarnera aammalu innimiillisaartoqartarnera akuersaarnanngeqisoq oqalunnerinnaassanngippat innuttaasut minnerunngitsumillu Qimussertartut Kattuffiat piginnittullu tamatta oqallinneq pitsaasumik anigortariaqarparput.

Inuusssutissarsiornermut Naalakkersuisoq oqarportaaq suleqatigiilluarnikkut unioqqutitsinerit taamatut ittut pinngitsoortinniassppata sukkasuumik iliuuseqartariaqarlutik.

- Iliuusissaasinnaasunut tunngasut, tassalu Qimussertartut Kattuffiannut nassiutinngitsuuarsussimagatsigit ajuusaarutigaara. Piumassuseqarpugulli Naalakkersuisuninngaanniit, aamma maani naalakkersuisoqarfik suleqataarusuppoq.

Inuussutissarsiornermut, Suliffeqarnermut Inuussutissarsiutinullu ilinniartitaanermut Naalakkersuisoq Siverth K. Heilmann taama oqarpoq.

Inuussutissarsiornermut pisortaqarfiup Qimmit qimuttut pillugit 2007-imut iliuusissatut pilersaarutaat februaari-marsimi nassiussuunneqarpoq. Ilaatigut susassaqartut suleqatigiinnerunissaanik kaammattuinertaqarluni. Innuttaasut ataatsitittarnissaat aamma siunertanut ilaavoq. Nerutit nakorsaata Ilulissaniittup siusinnerusukkut ataatsimiititsiniartarnerigalui takkuttukittarnera pillugu iluatsippiarneq ajortarsimapput.

Qimmit pillugit iliuusissatut pilersaarut inuussutissarsiornermut pisortaqarfiup nittartagaani nanoq.gl-imi qimmit pillugit quppernerni atuarneqarsinnaavoq.