Qimuttut Danmarkimi kingumut oqallisigaat

Qimuttut pillugit oqallinneq Danmarkimi ingerlaqqippoq. Folketingimi ilaasortaq, Kuupik Kleist, aviisimi ullormut saqqummersartumi, Informationimi, qimmit pillugit allaaserisaqarpoq.

Kuupik Kleist ilaatigut allappoq, qimmit naalliutsinneqartarnerannut suut pissutaanersut eqqartussallugit oqallitsitsisut puigorsimagaat.

- Uannut ilumoortuuvoq piniartukkormiut qimmiilu nunarsuup silaannaata allanngorarnerata eqqornerpaagai. Naalliutsitsinermik ajornartorsiut nunarsuaq tamakkerlugu ajornartorsiutit ilaattut isigisariaqarpoq. Piniartup qimmiisalu piunerat aputip sikullu tammariartornerattut sukkatigaaq. Inuuniutini taama sukkatigisumik piniartup taarseruminaatsippaa, Kuupik Kleist allappoq.

Kuupik Kleist aamma isumaqarpoq piniartup uumasut pineqarnissaannut malittareqqusat malinniassappagit, piniartup piniartutut inuuinnarnissaq periarfissarisariaqaraa. – Tassa imaappoq, piniartup ilaquttani qimminilu inuutissinnaasariaqarpai, maannalu tamanna silaannaap allanngorarneranit killilersimaarneqartoq ilisimaarineqarpoq, Kuupik Kleist qimmit naalliutsinneqarnerannut peqqutaasinnaasup allaaserinerani allappoq.

Kuupik Kleistip ilanngutaa, oqaaseqaatillu ilanngutamut tunngasut, Informationip internetikkut nittartagaani, information.dk -mi takuneqarsinnaapput.