Qimuttut atugarlupput
Qimmit niui nallorsimasut, perlertinneqartartut, imminullu paarisussanngorlutik qimaannarneqartartut. Qimmit pituuttatik kimmarlugit qimaannginniassammata kaataq atorlugu kigutaarneqartartut, qimmillu peerneqanngisaannartunik anoqartuaannaramik ikii ammaannartut. Kalaallit Nunaanni qimuttut atugaat ilaatigut taamaapput. Allaaserisaq taamaattoq Ekstra Bladimit allaaserineqarpoq, apersorneqarsimalluni nunatsinni uumasut nakorsaat Marit Holm.
Marit Holm suleqataalu Elisabeth Mærsk-Møller, namminersornerullutik oqartussani atorfeqarput, Sisimiuniillu Qaanaap tungaanut aammalu tunumi qimuttunik 21.000-inik nakkutiginnittuusarput.
Uumasut nakorsai akulikitsumik qimminik perlertingajanneqarsimasunik perlertinneqarsimasunilluunniit naammattuuisarput. Qimmit ilaat aasaq naallugu nerisinneqarneq ajorput, inuttaat aasaq naallugu aallaqqasarmata.
Qimmerpassuit imigassaqaratik qilallutik aasami toqusarput, taama Marit Holm oqarpoq.
- Angerlarsimaffinni uumasuutissatut Kalaallit nunaanni qimmit isigineqarneq ajorput, sulisussatulli atorneqartarlutik. Qimmerpassuaqarporli akuersaarneqarsinnaanngitsumik pineqartartunik. Marit Holm oqaluttuarpoq kalaaliinnaanngitsut aammali danskit qimmiutillit uumasuutiminnik eqqunngitsumik pinnittartunik.
Uumasut nakorsaata aasaanerani angalanermini qimmit saluppallaalersimasut 62-it toquinnartariaqarsimavai.
Ukiuni kingullerni Kalaallit qimuttunik pisariaqartitsinerat annikinneruleriartorsimammat, naalliutsitsisarneq atuunneruleriartorsimasoq, Marit Holm oqarpoq.
- Kalaallit inooriaasaat ukiuni kingullerni arlaqalersuni allanngoriartuinnarsimavoq, sumiiffiillu ilaanni qimuttunik ataqqinninneq tammavissimavoq. Qimmit iluamik paarisinnaanngikkaanni allamut tunniunnianngikkaanni toqutsinneqartariaqarput, Marit Holm oqarpoq.
