Qimuttuitsut Tysklandimi ajutoorput

Tysklandimi qimuttuitsut sukkasuuliat aqqutaanni qimuttuitsut ajutoorujussuarmata inuit 20-t missaanniittut ajunaarsimassangatinneqarput. Naalagaaffimmi naalagaaffeqatigiinnut ilaasumi, Niedersachsenimi, oqartussaasut taama nalunaarput.

Qimuttuitsut qamutaanni sequmissimasuni inuit ikinnerpaamik 18-t iserfigineqarsinnaanatillu anillatsinneqarsinnaanngillat, naatsorsuutigineqarpoq taakku toqusimassasut.

Qimuttuitsut sukkasuuliat ingerlatsisoqaratik qimuttuitsut perlaavisigut kajungerisalikkoortillutik ajutoorput. Ajutoortut taakku qimuttuitsut perlaavi aalajangersimasumik takissusillit misilitsillugit qamutit ilaat sulisunit atorneqartartoq aporpaat.

Niedersachsenimi oqartussaasut avammut oqaaseqartittagaat oqarpoq, inuit 29-t qimuttuitsunut ilaasimasut, qimuttuitsullu nalunaaquttap akunneranut kilometerinik 200-nik sukkassuseqarlutik ingerlaartillutik ajutoorput.

Ilaasut tassaassangatinneqarput qimuttuitsoqqarfimmi sulisut ilaqutaat, qimuttuitsut misilinneqarnissaannut qaaqqusaasimasut.

Qimuttuitsut aqqutaat nunamiit meterinik arlalinnik qutsitsigisumiimmata annaassiniarneq ajornakusoorpoq, kranersuimmi immikkut illuinnartut annaassiniartut atortariaqarmatigik.