Qimuttuitsut lastbiilinut apormata inuk ataaseq ajunaarpoq

Latsbiilit qimuttuitsunit Tølløsep ungasinngigisaani Soderupimi ullaaq aporneqarmata angut ataaseq ajunaarpoq, qimuttuitsunillu aqutsisoq kiggisimalluni.
Allattoq Mads Lynge
septembarip 19-at 2009 17:07

Qimuttuitsut IC3-mik taaneqartartut 21-nik ilaasoqarlutik ajutoorput, toqutaasorli lastbiilimiittuusimanersoq qimuttuitsuniittuusimanersorluunniit politiit nalunaarutigisinnaanngikkallarnerarpaat.

Qimuttuitsut lastbiilit Danmarkimi ullaaq arfineq-marlunngulersoq aporput, ajutoorfiullu nalaani putsingaatsiarmat erseqqarlussimavoq ajutoornermullu tamanna pissutaasimasinnaanersoq, Midt- og Vestjyllands Politip Banedanmark peqatigalugu maanna misissuileruttorput.

Qullit kalerrisaarutit qimuttuitsullu aqqutaata assiaqutaa ajutoornermi aserorneqarmata, paasiniaanerit ajornakusoorput.

Lastbiili aporneqarnermi kingorna ikuallalerpoq, qimuttuitsullu illinernit pillukaraluarput, ullulli ingerlanerani ajutoorfimmiit ingerlasinnaalerlutik.

Ajunaartup saniatigut inuit arfineq-marluk allat aqqunartiterput. Qimuttuitsunik aqutsisut marluk aqqunartiternerpaapput, ataaserlu Holbækip napparsimmaviani maanna uninngavoq, ilisimajunnaaqqalluni, nakkutigineqarlunili.

Qimuttuitsunik aqutsisup aappaa Glostrupip napparsimmaviani uninngavoq qimerlumigut ajoqusingaatsiarsimalluni.

Ajutoortut allat napparsimmavimmiit angerlartinneqareerput.