Qimuttuitsut kranimut aportut

Qimuttuitsut Sverigimi Stockholmimit Københavniliartut ippassaq unnukkut ajutoorput. Ilaasunit 244-uusunit 18-it napparsimmavimmut unitsinneqarput.
Allattoq Elisa Isaksen
septembarip 13-at 2010 07:13

Ippassaq unnukkut arfineq-pingasunut tanneq arfineq-pingasunngortoq qimuttuitsut illoqarfiup Kimstadip eqqaani kranimut aporput, aviisip Jyllandspostenip nittartagaani tamanna allaaserineqarpoq.

Arnaq 24-nik ukiulik sakkortuumik ajoquserneqarnermi kingorna pilanneqarpoq, aamma nukappiaraq qallunaaq aqqaneq-marlunnik ukiulik niaqqumigut kilerneqarnini pissutigalugu napparsimmavimmi unnuitinneqarluni. Aamma kranimik ingerlatsisoq ajoquserneqangaatsiarpoq, inuunerminilli ulorianartorsiorani.

Igalaat aseqqukui, aak issiaviillu silaannakkoortut, isiginnittut takusimallugit oqaluttuaraat. Ilaasut ilaat ima oqaluttuarpoq:

- Issiaviit kaanngartiterput silaannakkoorlutillu. Igalaat aseruatiterput. Niviarsiaraq uanniit 4-5 meterinik ungasissusilimmi issiasoq igalaamit eqqorneqarpoq, ajoquserneqangaatsiarlunilu. Nakorsamik ilaaqateqaratta, taassuma ingerlaannaq ikiorpaa anersaartorsinnaaneranillu ikiupallallugu.

Qimuttuitsut aqqutaat suliarineqarmata qimuttuitsut nalunaaquttap akunneranut 70 kilometeriinnarnik ingerlaqqusaagaluartut, Sverigimi politiit oqaatigaat qimuttuitsut nalunaaquttap akunneranut 110 aamma 115 kilometerinik sukkassuseqarsimassagunartut.