Qimuttuitsuni aninngitsoorlutik uippallertut
Danmarkimi Hillerødimiit Høje Tåstrupip tungaanut qimuttuitsut 25-inik ilaasoqarlutik ippassaq unnukkut ingerlaartut ilaasunut uippakajaartitserujussuarsimapput, tassa højtaleri ataaseq aserorsimasimammat ilaasut ilaasa qimuttuitsuniit aneqqusaanertik tusaanngitsoorsimammassuk.
Qimuttuitsut Birkerødip missaanut unnukkut arfineq-pingasut missaanni pillutillu oqinninnguaq aporsimavaat. Qimuttuitsunik ingerlatitsisoq Birkerødimi qimuttuitsut unittarfiannut pigami, ilaasut anillaqqusimavai. Inatsisaavormi q imuttuitsut arlaannik aporsisimagunik qimuttuitsut aporsisut taakku ingerlaqqusaajunnaartarnerat. Ilaasulli tunorlerpaamiittut aneqqusineq tusaanngitsoorsimavaat, issiaffianni højtalerip aserorsimanera pissutigalugu. Issiaannarsimappullu, minutsillu arlaqangitsunnguit qaangiummat qimuttuitsut ingerlaqqipput.
” Qimuttuitsut unittarfii qaangiataaginnarlugit unissanatalu sukkaqaluta ingerlarsuleratta annilaaqaagut. Inuit tatamiiaaginnavipput. Niviarsiaqqat marluk qulit/aqqaneq-marluk missaanni ukiullit qiaatigalutik nilliapput, taakkulu uanga tuppallersartariaqarpakka, ilaasut ilaat oqaluttuarpoq. Aamma imaassimavoq qulliit qameqattaarsimallutik, ilaasullu paatsiveerutivissimapput.
Vesterportimi qimuttuitsut unittarfiat nalliliivillugulu ilaasut ilaata ajutoortoqarnerani kigaallassaat toorsimavaa, qimuttuitsullu unimmata inuit qaleriiaatiinnaq aniniussimapput, qimuttuitsulli unittarfianni aatsat unissimallutik, ilaasullu tupaqqaqisut aatsaat tassani anisinnaasimapput.
DSB-p pisoq ajuusaarutigeqaa, qimuttuitsunilli ingerlatitsisoq inatsisinik unioqqutitsinngimmat suneqarnavianngilaq, aammamigooq højtalerit aserorsimanerat ilisimasimanngimmagu.
