Qimussit 46-t sukkaniutissapput

Allattoq Mads Lynge
marsip 27-at 2005 16:59

Ukioq manna Avannaata Qimussersua piareersarneqaleruttorpoq. Piareersaatilli siornatigutut inngillat.

Avannaata Qimussersua ukioq manna Ilulissani ingerlanneqassaaq, Uummannami ingerlanneqartussaasimagaluarluni, sikkorluppallaarneratali tamanna ajornarsisippaa.

Avannaata Qimussersuanut peqataasut kommunikkaarlugit tallimaasarput. Uummannalli Kommuneani nunaqarfiit marluk, tassa Illorsuit Nuugaatsiarlu, avinngarusimavallaarnerat pissutigalugu immikkut unammisinneqartarput, tamarmillu immikkut pingasunik peqataatitaqassapput. Soorlu aamma Ilulissat Kommuneannit nunaqarfiit marluk, Qeqertaq aamma Saqqaq, taamaaliussasut, Avannaata Qimussersuanut aaqqissuisoq Finn Siegstad ilisimatitsivoq.

Ingerlaarfissarli 40 kilometerinik isorartutigisup tamaa aqqutigissaarpallaanngimmat aputilersorneqartariaqassasoq aaqqissuisunit aamma oqaatigineqarpoq.

Ukioq manna peqataasut 46-ssangatinneqarput, apriilillu 9-ani unammisoqassaaq.