Qimussimik sukkaniunnersuarmi kinguleruttoqarpoq

Qimussit sukkaniuttut ilaat Alaskami Nome-mut suli apuutinngillat.
Allattoq Elisa Isaksen
marsip 19-at 2011 16:56

Alaskami qimussimik sukkaniunnersuarmi Iditarod-imik taagorneqartumi peqataasut ilaat suli qaqqat, aput sikulu aqqutigalugit apuunniarsaripput. Qimussimik sukkaniuttut 62-iullutik marsip arfernanni aallarput, taakkunanngali 15-it qimmiminnik ajornartorsiorlutik, ajutoorlutik issersuarluunniit patsisigalugit uniinnartariaqarsimapput.

Ellen Halvorson aqqaniliinnarnik qimuttoqalersoq unammisuni maanna kingulliuvoq. Taanna tarnit nakorsaattut ilinniarsimasuuvoq, internetikkullu nalunaarummini oqaatigalugu, qimussimik sukkaniunnersuarmi peqataanikkut pinertussuseq, ajornartorsiutinik qaangiiniarsinnaaneq aamma annilaanganermik navianartorsiornermillu misigisaqarneq, ilinniarneqarsinnaasut. Aamma 50-inik ukioqalernini nalliussillugu unammeqataanerarpoq.

Sukkaniunnersuup aallartinneranit ullut arfineq pingasut qaangiummata ajugaasoq apuutereerpoq, ullaarmannali sukkaniunnerup aallartinneranit ullut 14-it qaangiutereersut, qimussit arfineq marluk suli apuuffissaminnut Nome-mut suli apuutinngillat, taakkuli nalliuttorsiualaarnerit Nome-mi aallartitsinnagit apuunnissaat neriuutigineqarpoq.

Tassami ajugaasoq sukkaniuteqataasullu allat Nome-mi sapaatiuppat nalliuttorsiutigineqartussaapput. Sukkaniunnermi ajugaasoq John Baker Qeqertaarsummiu tassa Kotzebue-meersoq, sukkaniunnersuarmi tassani Inuppiani siullersaalluni ajugaasuuvoq, tamannalu immikkut nalliuttorsiutiginiarneqarluni. Ajugaasoq taanna nalliuttorsioqatigiinnermi 250.000 koruuninik aamma lastbilinik akissarsitinneqassaaq. Sukkaniuteqataasunut assigiinngitsunik aamma akissarsiassaqartitsisoqassaaq.

Qimussimik sukkaniuffigineqartoq nunarsuatsinni isorartunerpaasoq, Qaanaamiit Nuummut isorartussutsip missiliorpaa.

Marianne Stenbækip ilanngutassiaa taama kalaallisuunngortipparput.