Qimussimik ajutoortoq SANA-mut aallaruppaat
Illerngit aqqusinermut ujaraarartalimmut killinganni ajutoorneq pivoq, qimussertartullu peqatigiiffiannit oqaatigineqarpoq, Sisimiuni qimmiutillit ajutoorfik tamanna ukiuni arlalinni naammagittaalliutigisaraat, Heliportitoqqap eqqaani qimmit pitussimasarfiata inissisimaffilunnera pissutigalugu.
Tamanna aqqutigiuminaappoq, soorlu biilinut inissiffissalulluni, qimusserluni ulorianartaqaaq, ippassarlu tassa ajutoortoqavissorpoq. Qimussertoq biilillu aporput, qimussertullu kilertiternermi saniatigut qinngani napivaa, kilernerisalu ilaat napparsimmavimmi kingorna mersortariaqarluni.
Qimussertoq Nuummukaattariaqarsimavoq, Dronning Ingridillu Napparsimmavissuani maanna uninngavoq, qinngami suliaritinnissaa utaqqillugu.
Qimusseq Sisimiut Qeqqata Kommunianut arlaleriarluni naammagittaallioreeraluarpoq, qimmit pituttorsimasarfiat nutaaq pitsaanerusumik iluarsaateqqullugu, aningaasassaaleqinerli utoqqatsissutaajuaannarpoq.
- Kingullerpaamik ajutoortoqarsorinngilarput, kommunalbestyrelselu aammaarluta qinnuvigaarput ajornartorsiut iluarsiniaqqullugu. Qimmit 5-600-it tassani pitoqqasarput, pituttorsimasarfiallu iluarsartuuteqqunaqaaq, iluamik pilersaarisiorlugu, Qimusseq Sisimiunit kommunalbestyrelsemut aammaarlutik allapput.
