Qimussertartutut allagartartaarusukkuit Tasiilamukaannassaatit
Takornariat issittumukartartut amerlinissaat pillugu Københavnimi ulluni kingullerni workshop-ertoqaqqammerpoq, qimussertartutullu allagartartaarnissaq Tunumi takornariaqartitsisut Destination East Greenlandikkut isumassarsiaraat.
- Qimusserneq, arfernik takornariartitsineq unnuamilu seqinnerneranik misigisaqartitsinerit Norgemi Alaskamilu takornariartitsissutigineqartarput, taamaammat Kalaallit Nunaanni neqeroorutigineqartartussat immikkuullarissuusariaqarlutillu nutaaliornerusariaqarput, Nunatsinni Takornariaqarnermi Inuussutissarsiornermilu Siunnersuisoqatigiinni ineriartortitsinermi pisortaq Mads Skifte oqarpoq.
Nordisk Innovations Center, Nunatsinni Takornariaqarnermi Inuussutissarsiornermilu Siunnersuisoqatigiit aamma Nordisk Atlantsamarbejde nittarsaassinermik aaqqissuisuupput.
Takornariaqartitsinermi nalinginnaaleraluttuinnartut naapertorlugit iliuuseqartoqarnialerpoq, takornariallu issinnerusumi feeriarusuttut immikkut sammineqarlutik.
Illu Atlantikumi, Københavnimiittumi Nuuk Tourism, Destination East Greenland allallu neqeroorutiminnik nittarsaassipput.