Assi: Visit Greenland/Mads Pihl

Qimussertartut unammeqataasinnaalernerat assigiinngitsumik tiguneqartoq

Qeqertarsuarmiut qimussertartut Avannaata Qimussersuani aappaagumit unammersuaqataasinnaalerput. Nutaarsiassaq taanna qimussertartunit assigiinngitsumik tiguneqarpoq.

Qeqertarsuarmiup qimminik qimuttuunngitsunik qimminut qimuttunut akusisimasutut pasineqarluni suliaqarfigineqarnerani, Qeqertarsuarmiut allat qimussertartut Kalaallit Nunaanni Qimussertartut Kattuffiata, KNQK-ip, aaqqissuussaanut tamanut mattunneqarput.

Mattussineq kalaallit qimmiata qimuttup qimminit allanertanit akuneqaratarsinnaaneranut ernumassuteqarnermik tunngaveqarpoq.

Kisianni Qeqertarsuarmiut qimussertartut KNQK-ip aaqqissuussaanut tamanut aappaagumiit peqataasinnaalerput. Soorlu Avannaata Qimussersuanut.

AAMMA ATUARUK Qeqertarsuarmiut Avannaata Qimussersuanut peqataaqqissinnaalertut

Tamanna KNQK-ip Ilulissani sapaatip akunnerata naanerani ataatsimeersuarnermini aalajangerpaa.

SULIAP INGERLANIKUUNERA:

Januar 2018:

  • Kalaallit Nunaanni Qimussertartut Kattuffiat, KNQK, pasilliutinik anngussivigineqarpoq.

Oktober 2018:

  • KNQK-p Qeqertarsuarmiut Kangerlummiullu pasilliuteqartoqarnera pissutigalugu oktobarip 17-ani 2018-mi Avannaata Qimussersuanut mattummagit suliaq avammut saqqummiunneqarpoq.

November 2018:

  • Inatsisartut aalisarnermut piniarnermullu ataatsimiititaliaata taamani aalisarnermut piniarnermullu naalakkersuisuusoq qimmit pasilliutigineqartut DNA-vi misissorneqassasut piumasaraat. Misissuiffigineqalereerpulli.

Marts 2019:

  • Kukkuluttuttoqarneratigut DNA-mik misissuineq januarimili piareersimasussaangaluaq kinguarpoq.

Maj 2019:

  • DNA-mik misissuineq piareerpoq - inernerali isertuunneqarpoq.

Juni 2019:

  • Kommune Qeqertalimmit uppernarsarneqarpoq qimmillip kissaateqarneratigut qimmit pasilliutigineqartut oktobarip 25-ani 2018-imi toqunneqarsimasut.

Juli 2019:

  • Aalisanermut piniarnermullu naalakkersuisup uppernarsarpaa innuttaasup suliamut akuusup inatsisitigut innarlitsaaliugaanerata qulakkeerneqarnissaa kiisalu sulianik suliarinnittarnermi pisortat sulianik pineqaatissiissutaasinnaasunik suliaqarneranni tunngaviinut malittarisassat eqqortinneqartussaaneri.

Oktober 2019

  • Suliaq eqqartuussivimmut anngunneqassangaluaruni pisoqalereersimassammat politiit suliamik misissuinerminnik unitsitsipput

December 2019:

  • Qimmit qimuttut marluk DNA-visa misissorneqarnerisa allanertanik akusaasut takutippaat.

Aasaq 2020:

  • KNQK-p qimussersat ukiuni tallimani mattunneqarnissaat aalajangerpaa

Qimussertartoq: DNA-mik missuinerit ingerlaannartariaqarput

Taamalu aalajangertoqarnera qimussertartunit nunap immikkoortuinit marlunneersunit assigiinngitsumik tiguneqarpoq.

- Ataatsimeersuarnermi amerlanerussuteqartut aalajangigaat ataqqivara, neriuppungalu Qeqertarsuarmiut Avannaata Qimussersuanni peqataaqqittalerneranni qimmiisa DNA-visa misissuiffigineqartuarnissaat, soorunalimi uggorisarsimaqaarput Qeqertarsuarmiut mattussaanerat, maannalu peqataaqqittalissammata nuannaarpugut, Gaba Rosbach oqarpoq.

Gaba Rosbach Qasigiannguani najugaqarpoq aamma qimussernerup iluani eqeersimaarluni ilaasortaallunilu aaqqissuinernut ukiuni arlalinni peqataasarsimavoq.

Taannalu qularuteqalaarpoq.

AAMMA ATUARUK Pasilliutit nutaat: Qimmit allanertat piaraat Qeqertarsuarmi suli qimmerineqarput

Gaba Rosbachimmi oqarnera naapertorlugu pingaaruteqarluinnarpoq peqataasut tamarmik malittarisassanik malinnittarnissaat aamma qimmit allanertanik akuneqannginnissaannut qulakkeerinneqataanissaat.

- Kalaallip qimmia qangaaniilli akutsaaliugaavoq aamma pisariaqanngilaq allat qimmiinik akoorlugu arlaatigut sukkaniuunnermut atugaalissappata. Qangaaniilli nalunngilarput kalaallip qimmia piniutitut, aalisaatitut aammalu unammiuaarutitut atugaasoq, Gaba Rosbach oqarpoq.

Taamaattumik isumaqarpoq misissuinerit ingerlaannartariaqartut:

- Misissuiuartariaqarpugut ilumut suli akusaqarnersoq imaluunniit tamanna qaangiussimanersoq, oqarpoq.

AAMMA ATUARUK KNQK: Qeqertarsuarmi qimmit qimuttut marluk allanertanik akusaasimapput

Qimussertartoq alla: Qimmit akusaanngillat

Gaba Rosbach qularuteqalaartoq, qimussertartoq alla Uummannameersoq qularuteqannginneruvoq.

Tassaavorlu Thomas Zeeb, Qimusseq 85-imi siulittaasoq.

- Tassa qularinngilara uanga akusaanngitsut, oqarpoq.

Thomas Zeebilli neriuutigaa tamanna inatsisiliunneqassasoq qimmit aavisa allanik akuneqaqqinnginnissaat qulakkeerniarlugu.

- Inatsiliuuttariaqarpoq.

- Qimussertartut Kattuffiata inatsisaani tunngavissaqanngilaq taamatut mattussisoqarsinnaaneranut, Thomas Zeeb oqarpoq.

Qeqertarsuarmi qimmit qimuttut pillugit suliaq 2018-imi aallartippoq.

Taamani qimmilik Qeqertarsuarmut qimminik allanertanik eqqussisimasutut pasillerneqarpoq. Pasilliutigineqartullu DNA-nik misissuisoqareernerata kingorna 2019-ip naajartulernerani uppernarsarneqarput.

AAMMA ATUARUK Ukiuni tallimani sukkaniuteqataasinnaajunnaarsitaasoq

Suliarlu 2018-ip ukiarnerani saqqummiunneqaqqaarmat Qeqertarsuarmiut qimussertartut ilaatigut Avannaata Qimussersuanit mattunneqarput, ilaatigummi KNQK-mit ernummatigineqarmat kalaallit qimmiat qimuttoq allanertanik akuneqarsinnaasoq.

Qimmit pasilliutigineqartut marluk aappaata DNA-vanik misissuinerit kingorna takutippaat allanertamik akusaasoq. Qimmip pasilliutigineqartup aappaa misissuiffigineqanngilaq, misissuinerit aallartinneranni toqunneqareersimammat. 

Qeqertarsuarmiu qimussertartoq, qimminik allanertanik qimuttunut akusisoq, KNQK-p aaqqissuussaanut tamanut siorna ukiuni tallimani peqataasinnaajunnaartinneqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat