Qimussertartut Kattuffiat: -Pituutanik kipisisarneq naalliutsitsinerunngilaq

marsip 28-at 2007 10:53

Qimussimik unamminerit nalaanni, unammeqataasunit qimmit pituutaasa kipiinnarneqartarneri, uumasut nakorsaata ullaaq Radioaviisimi uparuarpaa. Qimussertartartut kattuffiani siulittaasoq, Mikkel Jeremiassen oqarpoq, uumasuuteqartarneq pillugu inatsisartut inatsisaat qimuttunik qimmeqarnermut tulluanngitsoq, Naalakkersuisorlu Sivert K. Heilmann ataatsimeeqatigisimavaat. Mikkel Jeremiassen ima oqarpoq:

- Oqariartuutigaarput, qimmeq naalliutsikkumanagu pituutaa allatut ajornartumik kipisarlutigu. Qimmeq kipisarparput, qasusoq takuleraangatsigu, uniaannarumanagu naalliutsikkumanagulu. Naalakkersuisunut inatsisartunullu suliakkiissutigaarput, apeqqutaanerpaavormi inatsisip taassuma ullumikkut atuuttup, ajunngitsuliornissaq naapertuilluarnissarlu siunertarineraa, taannalu apeqquserparput, Mikkel Jeremiassen oqarpoq.

Uumasut nakorsaata Marit Holmip, ukiuni arlaqalersuni qimuttunik pituussaarinnittarnermik akerliunini oqaatigiuarsimavaa:

- Qimmerpaalussuit qaqqanut qimaasarput. Qimuttummi amerlasuut nujuartuusarput, inunnillu ilisarisimanngisaminnit tiguneqarusunneq ajorlutik. Taamaallaat inuttaminnit qanillineqarusuttarput, Marit Holm oqarpoq.

Uumasut nakorsaat aperaarput, qimminik taamatut qimassiinnartarneq uumasunik naaliutsitsinerunersoq, taannalu ima akivoq:

- Aap, taamatut oqartoqarsinnaavoq. Qimuttut arlalissuit qimmeqarfimmut apuutinngitsoortarput, tassami qimuttorpassuit nujuartuusaramik. Qimmillu illoqarfimmukarnissartik ersigisinnaasarpaat, aamma ilaqartarput qimunnerup nalaani ajoqusersimasut, taamaasillutillu nammineerlutik angerlamut apuussinnaasaratik, toquinnartarlutillu.

- Perlerlutik qiullutillu toquinnartarnerat, uanga taanna ilisarisinnaanngilara. Kattuffik 1998-imiili aarlartimmat, suliassanik taamaattunik takusimanngisaannarpunga. Qimussertartut Kattuffianni siulittaasoq Mikkel Jeremiassen oqarpoq.