Qimussertartut Kattuffiat nersutillu nakorsaat iliuuseqaqquaat

Qimmit Sisimiunitulli Kangaatsiami nalusanit aamma toqunneqartarput. Qimmiutilik Sakarias Siegstad oqarpoq, nammineq siorna qimmit arfineq-pingasut aasaanerani qeqertamut illoqarfiup saannguaniittumut inissitami ilai aallaaneqarlutik toqunneqarsimasut. Maannalu qimmiisa 16-iusut iluatiginerpaasaasa ilaat ataaseq toqunneqareersimavoq:

-Ataatsimik ilanngareersimapput, pakatsinangaatsiartarpoq, tassami ukiut siulii eqqarsaatigalugiinnaraanni ukioq kingulleq arfineq-pingasunik ilanngartinnikuupput qeqertamiinnerinnarminni. Sakariaq Siegstad oqarpoq.

Qimmit uiartuunnikkut toqusut aallaaneqarlutillu toqusut nalunarneq ajorput. Qeqertami ulinnerup angusimagaangagit ilaat nassaarinngisaannartarpaat, toqungasulli nassaarisaat aallaaneqarsimasarput.

- Suliarujussuaq annaasarparput. Assersuutigalugu ukioq kingulleq sukkaniuutissatut suliaraluakka arfineq-pingasut annaagakkit reserve-ssatut nutarannguit aamma aallaqqaataaniit aallartikkaluarakkit massakkut aamma ilanngareerput, nassuiaavoq. Nalulluinnarnerarpaali kina qimminik toqoraasarnersoq.

- Inuttarsisinnaanngilarput ajuusaarnaraluartunik. Inuttarsigutsigu allatut ajornartumik qanoq iliuuseqartariaqartussaassaagut. Naalliutsitsinerugami, nangippoq.

Assersuutigaa timersornermi arsarnerni holdi tamaat inuttaaruppat, nutaanik inuttalerluni angusarissaassappat suliassarujorujussuaq suliarineqaqqaartariaqartoq.

- Massakkut inuusuttorpannguit maani qimmeqartut eqqorneqassagunik pakatsissaqaat. Uanga ukiut qulit eqqorneqartareernikuullunga pakatsinartuaannartuusarpoq, taamaammat iliuuseqartariaqarpoq, kaammattuivoq.

Kalaallit Nunaanni Qimussertartut Kattuffiat aamma nersutit nakorsaat avammut suaartaannaratik nunatta iluani suliniartariaqarsorai.

- Suunukua tunulequttat piumasarigaat. Piumasat suunersut paaseriarlugit illersuutaasussat Kattuffiup nersutillu nakorsaata angusariaqalerpaat.

Sakarias Siegstad aamma oqarpoq, ilaatigut sinnganeq tunngavigalugu allat qimmiinik toqutsisoqartartoq.

Kangaatsiami najugalik alla manna qimmeerukkallartoq Egede Filemonsen oqaluttuarpoq qimminik toqoraasarneq ukiorpassuarni ajornartorsiutaajuartoq.