Qimussersuaqataasut suli apuutinngitsut
Upernaviup nunaqarfiisalu eqqaani sikkorlummat sukkaniukkiat taakkua marluk Nutaarmiuni uninngagallarput, ingerlaartup aappaata angerlamut 200 kilometerit missaat suli aqqutissaraa.
Avannaata Qimussersuanut Kullorsuarmiit aamma Nuussuarmiit annguttut qimusserlutik Upernaviliarput, qaammatip ataatsip matuma siornata missaa qaangiuttoq. Taamani Upernavimmiit Ilulissanut qimmii qamutaallu timmisartuunneqarput. Avannaatalu Qimussersua ingerlanneqareermat Upernavimmut aamma timmisartuunneqaqqipput. Taamanilu pilersaarutaavoq namminneerlutik nunaqarfimminnut aamma ingerlaarnissaat:
- Marsip 14-anili kujammut aallarpugut peqataajartorluta Upernaviup tungaanut. Marsip 29-ani sukkanniunneq naammassimmat avannamut ingerlaarpugut. Maanna Nutaarmiunut killippugut, Avannaata Qimussersuani sukkaniuteqataasut ilaat, Aron Sakariassen, oqaluttuarpoq.
Jonas Kristensen Upernaviup nunaqarfiisa avannarlersaaneersoq aamma Nutaarmiuni uninngagallarpoq, qimussimillu ingerlaarfissaa suli 200 kilometerit missaannik isorartussuseqarluni.
Sikkorlukkaluartorlu aqagu misiliillutik avannamut ingerlaarniarput:
- Kisiannili aamma qulingani bilitseqarpunga Kullorsuarmut ingerlanissannut, Innaarsunninngaanniit sikkorlussappat allatut ajornartumik qimmikka qimattariaqassallugit. Aammalu nalunarluni ukiup sinnerani takoqqissanerikka taakkua qimmikka, Jonas Kristensen oqarpoq. Taassuma kattuffimminnit ajornartoornerminni ikiorneqarsinnaanertik neriuutigigaluarpaa.
Avannaata Qimussersuanut unammiat nunaqarfimminniit aallarmata maanna qaammatinngulerpoq:
- Unammialeratta soorunami taama eqqarsarsimanngikkaluarpugut taama sivisutigisumik peqassanata. Maanna qaammatinnguleratsigu aallaqqalluta. Avannarlersaagatta. Piffissamik atuinartorujuugami avannaaninngaanniit taamatut sukkaniuttunut peqataaneq. Eqqarsarnarsilluni uagutsinnut piffissamik atuinarnermut avannarlernut ilaalluni aqqutit imaannaanngilaarnermut, Aron Sakariassen oqarpoq.
Jonas Kristensenip neriuutigaa ullut pingasut sisamalluunniit qaangiuppata Kullorsuarmut apuussinnaanissani, siku aqqutigineqarsinnaassappat.
