Qimussersat tuluttut oqaatsinik igaassaqqissunillu immersorneqarput

Qapuusat imermik qalattumik akullugit qalaannarissat tassaasarunanngillat takornariat nunatsinnukarnerminni misigerusutaat.

Taamaammat Ole Lundbladip misilittakkani ingerlateqqippai Tasiilami eqqaanilu piniartunut takornarianik qimussimik angallammillu angallassisartunut.

Isumassarsiat ilaattut ingerlateqqinneqarput puisip neqaanik gullasch illuaqqami piniariartarfimmi asimiluunniit iganeqarsinnaasut.

Pikkorissarnermi peqataasut aamma tuluttut oqaatsinik pikkorissarneqarput takornarianik angallassinermi oqaatsit pisariaqarnerit pingaarnersut ilinniartitsissutigineqartarlutik.

- Peqataasut isumassarsianik angerlaassinnaasaminnik aamma angalanermi atorsinnaasaminnik immersorneqarluarput. Taamaasilluni sapaatip akunnera naggaserluarneqarpoq, taama Destination East Greenland sinnerlugu Pia Anning Nielsen nalunaarpoq.