Qimusserluni sukkaniunnersuaq Iditarod Alaskami ippassaq aallartippoq

Avannaata Qimussersua qanilliartorpoq, qimusserlunili sukkaniunnerni nunarsuarmi annersaat The Iditarod Trail Sled Dog Race, Alaskami ukiut tamaasa ingerlanneqartartoq ippassaq aallartippoq.

Alaskami sukkaniunnermi Iditarodimik aaqqissuisut Alaskami sukkaniunneq nunarsuarmi sukkaniunnerit kingullersaattut annersaattullu taasarpaat.

Qimussit 62-it ukioq manna peqataasussaapput, qimusserlunilu ukioq manna sukkaniunnissaq malunnartinniarlugu Alaskami illoqarfiit annersaanni Anchorage-imi arfininngormat persuarsiortoqarpoq.

Nome-imi innuttaasut Inupiaat toqqusaarluutit ilaannik difteritisimik 1925-imi nappaalanerat, nakorsallu namminerlu kajumissutsiminnik ikiuisut qimusserlutik nakorsaatinik kingorna tikiussinerat, Iditarodimik taallugu sukkaniunnermut tunuliaqutaavoq.

Sukkaniunnerlu 1700 kilometerisut isorartutigisoq ippassaq aallartinneqarpoq, qimussit Anchorage-iminngaanniit Alaskap kimmut avannarpasissortaanut Nome-iliartinneqaramik.

Iditarodimik taallugu sukkaniunneq 1975-imi aallartinneqarpoq, ukiullu tamaasa sukkaniuttoqartarnikuulluni.

Sukkaniunneq sapaatip-akunneri marluk tikillugit sivisussuseqarsinnaasarpoq, unammeqataasullu akunnialunnguaannaat ilaatigut sinittarput, qimmilli aalajangersimasumik qasuersaartinneqartarlutik.

Uumasunik illersuiniaqatigiiffiit, soorlu PETA, qimusserluni sukkaniunneq akerliuffiginikuuaat, qimmillu ullut tamaasa misissorneqartarnissaat immikkuullarissunillu aloqusersorsimanissaat piumasarineqarluni.

Ajugaasut akissarsiassaat 3 millionit koruunit pallippaat, taakkunannga 250.000-it koruunit ajugaasumut akissarsiaritinneqartarlutik.