'Qimusseq Formel 1-erluni sukkaniunnermut unammisinneqarsinnaangilaq'

Alcoa pillugu pilersaarut Naalakkersuisuniit pimoorunneqarnersoq imaluunniit suliniutit allat angisuut nunatsinni ingerlanneqartussat kissaatigineraat, nalornisigalugu ataatsimut oqaaseqaamminni ersersippaat.

Aluminiumik aatsitsiviliortussat avataaniit suliartortut akissaataat pillugit siornatigut annertuumik isumaqatigiingittaraluartik taamaattoq suliniut pillugu aaqqissuussineq matoqqasutut, suliamut naammattumik ilisimasaqannginneq nunallu tamalaat akornanni sulinermut misilittagaqannginneq suleqatigiit taakku pingasut isumaqatigiissutigaat.

- Nunatta sulisitassai aallaangillat, qimussimik Formel 1-ertunut unammiaannakasillartut, taakku allapput, nangillutillu Kallallit Nunaata oqaluttuarisaanerani aalajangigassat pingaruteqarnersaat pillugu aqutsisussat misilittagaqanngitsut ivertinneqarsimasut.

Taamaattumik Alcoa pillugu isumaqatiginninniartussat aaqqissuussaanerlu allangorteqqullugit kaammattuuteqarput, taamaalilluni inunnik misilittagaqarnerusunik, ilisimasaqarnerusunik nunallu tamalaat akornanni attaveqaatilinnik sulisussanik nukittorsarneqarniassammat.

Tamatuma saniatigut piaarnerpaamik piginnittuunermut tunngasoq aamma iluarsiivigeqqullugu saaffiginnipput.

Kalaallit Nunaani isumaqatigiissutaasorujuuvoq kalaallit piginneqataanissaat piviusorsiortuungitsoq, taakku isumaqarput.

Alcoap piumasarissappagu Kalaallit Nunaat piginneqataasariaqartoq, taava Alcoap nukinnik atuiffigeqqinnissa pisariaqanngitsoq, SIK, Sulisitsisut kiisalu Qeqqata Kommunia isumaqarput.