Qimmiutilik: Qimuttut naalliutsitaanerat toqqissisimanngissutigaarput

Qimmiutillit qimmiminnik naalliutsisuungillat. Sisimiuni qimmit pingasut ikkatigineqarlutillu allanit toqunneqarsimapput. Pingaartumik qimmiminnik illoqarfiup illuatungaanut inissiisariaqartartut qimmimik ajortumik pineqaratarsinnaanerat ernummatigaat. Sisimiuni qimussertartut peqatigiiffianni siulittaasuugallartoq Hanseeraq Olsen taama oqarpoq. Hanseeraq Olsen oqarpoq nammineq qimmini allanit unatarneqartarnermik kingunerisaanik nikalluissut.

- Nalusannik inuit qimmikka nipiliulaartullu ornillugit unatarlugillu, taaqqortillugit. Sianerfigitittarama qujanartumik qimmima eqqaani najugallit. Qimmeragooq aakanna unatariarlugu pituussaarpaa. Taava majuartarpunga tiguniarsaralugu, kisianni tassa imatut nallinnartigilernikuupput ornikkaluaraangakkit qimaasarlutik, tigoqqunatik. Ullaaq-manna sininnartunik pisivunga 66 koruuneerlungaasiit, qimmera ataaseq kataqqammat, iisitippara massakkut sinilersiivara. Qimmikka tassa ajuusaarnaraluartumik nikallungapput aamma uanga sunnernikuuaannga. Meeqqatulli asagakkit aamma nalunngilara sinerissami qimmiutillit tamarmik taamaattut.

Hanseeraq Olsenip ileqqorigaluarpaa qimmiminik qeqertamut imilimmut upernaakkut nuutsisarneq. Qimmilli unatartittarsimanertik qininngassutigisimammassuk imminnut uiartuutissammata ukiormanna aallarutinngiinnarpai, sunaaffali pissaq aggersoq.

-Danmarkimiinninni qanittukkut aamma qimmikka marluk toqusimapput. Meeqqama nakkutigisaat. Isumaqarluta nangilluta pilluta, kisianni taamaajuikkamik paarineqarluaramik. Aappaali kinguaassiuutaatigunngooq usuata kangiatigut savimineq kapputitinneqarsimavoq usua uteqqissinnaajunnaartillugu. Pullattorsuanngormallu toquinnartariaqalersimavaat. Qimmip aappa pitoqqasoq kingulliivisigut noqiinnarlugu qimillugu aamma toqunneqarsimavoq.

- Kina taamaaliorsimanersoq tassa nalunarput,. Neriuppunga nassaarineqarumaartoq, paasineqarumaartoq. Nalorniinnarluni aarlerilluni sivisuumik tamatsinnut nuanninngilaq. Aamma tusaamanerluutigivallaaleqaarput sumit tamanit, allaannginnami qimmiutillit-aasiit pisuutitaaniartut.

Hanseeraq Olsen, Sisimini qimussertartut Peqatigiiffianni siulittaasuugallartoq aamma oqarpoq neriulluni qimmeqarnermut tunngasut, Ilulissanisulli pitsanngortinnissaat qimmmiutillit suleqatigiillutik aallartissagaat.

Sisimiuni politiit qimminik pingasunik piffissami kingullermi toqutsisimanerit kimit piliaanersut suli paasinngikkaat, politeeqarfimmi pisortaq Hans Falck Petersen oqarpoq.