Politikki

Qimmit tamarmik akiuussutissamik kapitittassapput

Qimmit qimuttut savaatillillu qimmii Namminersorlutik Oqartussanit akilerneqarlutik akiuussutissamik kapitittalissapput.

Allattoq Ivik Kristiansen, Anton Gundersen Lihn

novembarip 15-at 2016 06:51

Nunaqarfimmi Qeqertami qimmit qimmit nappaataannik januaarimi nappaateqalerput toqoralerlutillu. Taamaattoqaqqinnissaalu pinngitsoortinniarlugu qimmit qimmit nappaataannut parvovirusimullu akiuussutissamik kapitittalernissaasa inatsisitigut pisussaaffinngortinneqarnissaa pillugu Naalakkersuisut siunnersuuteqarput.

Qimmiutillit namminneerlutik qimmimik kapitinnissaat isumagisussaagaat Naalakkersuisut isumaqaraluarput. Qimmilli 400-t missaanniittut qimmit nappaataannik ukiup aallartinnerani toqquteqarput. Naalakkersuisullu tamatuma kingorna akuliuttariaqartutut misigisimapput, inatsisissatullu siunnersuuteqarlutik.

Aamma atuaruk Qimmit nappaataat Ilulissani tuniluutilertorpasittoq

Siunnersuullu Inatsisartunit tamarmiusunit akuersissutigineqarpoq.

Aamma qimmit inimiutat kapitittarnissaat pisussaaffinngortinneqartussanngorpoq, taakkuli kapitinnissaat qimmillit namminneerlutik akilertassavaat.

Inatsit nutaaq januaarip aallaqqaataani atuutilissaaq, 2017-imilu 4,5 millioninik aningaasartuutaanissaa naatsorsuutigineqarluni.