Qimmit savallu assersuunneqarsinnaanngillat
- Kujataani savaatillit assigalugit Qaanaami piniartut uumasuutiminnut naammattunik ukiornissaanut nerukkaatissaateqarnissaat inatsisitigut piumasaqaatigineqarsinnaanersoq oqallisigineqartariaqarpoq, Inatsisartut siulittaasuat Josef Motzfeldt Avanersuarm qimmit nerukkaatissaaleqinerat pillugu oqarpoq.
Avanersuarmili Kujataanilu pissutsit assigiinngeqaat, tamanna Josef Motzfeldtip eqqaamasariarpaa, Qaanaami piniartoq Mads Ole Kristiansen oqarpoq.
- Una eqqaamasariaqarpoq, qimmigut ivigartortuunngimmata nammineerlutalu nerukkaatissanik piniartariaqartaratta, nerukkaatissammi nunami naaneq ajorput, Piniartoq Mads Ole Kristiansen oqarpoq.
Kujataani Tasilummi savaatilik aamma Savaatillit Peqatigiiffianni siulittaasoq, Otto Nielsen aamma oqarpoq Avanersuarmi piniartuuneq Kujataani savaateqartuunermut assersuukkuminaatsuusoq.
- Maani Kujataani savaateqartuunermik inuussutissarsiorneq Avanersuarmilu piniartuunermik inuutissarsiortuuneq imaasiallaannaq assersuukkuminaapput. Uagut savaateqarnermik inuussutissarsiortuusugut narsaatigut iluaqutigalugit ukiuuneranut nerukkaatissanik katersisarpugut aammali avataaniit nerukkaatissanik pisiniarnitsigut uumasuutigut isumagisarlutigit. Avanersuarmiulli piniarlutik nerukkaatissaminnik katersisarlutik, tassa assigiinngitsupilussuarmik iliuuseqartarpugut, Savaatilik Otto Nielsen oqarpoq.
Avanersuarmi piniartut inatsisiliuunneqassappata, taava piniartut peqatigilluinnarlugit tamanna pisariaqartoq Otto Nielsenip aamma oqaatigaa.
- Savaatillit peqataatinneqarluta inatsisiliuunneqarnikuuvugut, qulaatiinnarluta taamaaliortoqarnikuunani. Tamannalu ajunngitsumik kinguneqarpoq. Avanersuarmiulli eqqarsaatigalugit taakku qulaatiinnarlugit inatsisiliuunneqassappata, tamanna aallerinartoqarsinnaavoq. Oqartussat piniartullu isumaqatigiilluinnarlutik oqaloqatigiinnissaat orniginarnerussaaq arlaannik aaqqiissutissanik ujarlernermi, Otto Nielsen oqarpoq.
Politikerit Avanersuarmiunik ikiuiniarunik taava piniagassat pisarineqarsinnaasut amerlisariaqarpaat immikkut inatsisiliuunnagit, Mads Ole Kristiansen oqarpoq.
