Qimmit qimuttut pillugit isumasioqatigiinneq
Uumasut nakorsaqarfiatami kisitsisaataasa takutippaat qimmit qimuttut ukiuni kingullerni qulini 22.000-iniit 15.000-inut ikileriarsimasut. Ukiut 20-t matuma siorna 31.000-iusimagaluarlutik.
Kalaallit Nunaanni Qimussertartut Kattuffiata qimmit qimuttut ikiliartornerat unitsikkusullugu isumasioqatigiinnermik aaqqissuisuupput. Isumasioqatigiinnerlu Nunatsinnit tamarmit peqataaffigineqarluassaaq.
Qimussertartut qimussertartuusimasullu peqataanerisa saniatigut Naalakkersuisut siulittaasuat, Aleqa Hammond, Avannaata Qimussersuanut illersuisuusoq, isumasioqatigiinnermi peqataassaaq . Aamma Nunatsinni kommuunit qimmit qimuttoqarfiusuneersut pingasut, tassa Kommuneqarfik Sermersooq, Qeqqata Kommunia aamma Qaasuitsup Kommunia peqataatitaqassapput, soorlu aamma kommuneqarfiit kattuffiata siulittaasua, Martha Abelsen, aamma peqataassussanut ilaasoq. Taakkua saniatigut Namminersorlutik Oqartussat, Visit Greenland aamma peqataassapput.
Kalaallit Nunaanni Qimussertartut Kattuffiannit neriuutigineqarpoq qimmit qimuttut ikiliartupiloornerannut isumasioqatigiinnermi tigussaasumik siunnersuuteqartoqarsinnaasoq qanoq ililluni qimmit ikiliartornerat unitsinneqarsinnaanersoq.
