Qimmit qimuttut ikiliartupiloorput
Qimmit qimuttut ikiliartupilooraluartut Kalaallit Nunaanni Qimussertartut Kattuffiata uumasut nakorsaatalu nungutaanissaa aarleqqutiginngilaat:
- Taama oqarusunngilanga. Kisianni ikiliartornerat qanoq iliuuseqarfigerusupparput. Aamma qimmillit, naggatissaa tikillugu qimmeqarusuttut, suli aamma inuppassuupput. Taakkulu soorunami isumalluutigaagut annerpaamik. Misigisimanngilagut aarlerinartorsiortoq, Mikkel Jeremiassen, Kalaallit Nunaanni Qimussertartut Kattuffianni siulittaasoq taama oqarpoq.
Uumasut nakorsaata, Sanne E. Wennerbergip aamma oqaatigisinnaanngilaa qimmeq qimuttoq ulorianartorsiornersoq:
- Kisitsisit takutippaat qimmit qimuttut ikiliartortut. Kisianni nalileruminaappoq qanoq ikitsigilerpata oqartoqarsinnaanersoq ulorinartorsiortoq. Kisianni tassa qularnanngilaq qimmit atorneqartarnerat piffissap ingerlanerani allanngoriartorsimasoq, Sanne E. Wennerberg Uumasut nakorsaqarfianit Ilulissaneersoq oqarpoq.
Qimmit qimuttut ukiuni kingullerni qulini 7000-inik ikilisimanerat assigiinngitsunik taassuma pissuteqarsoraa:
- Isumaqarpunga inuussutissarsiornermi qimmip atorneqartarnerata annikilliartorsimaneranik pissuteqartoq. Tassa qamuteralaat, umiatsiaaqqat angallatilluunniit atorlugit aalisarneq ingerlanneqarnerulersimammat, Sanne E. Wennerberg taama oqarpoq nangillunilu:
- Taakkua saniatigut qimmeqarneq aamma akisoorujussuuvoq. Puisinik, aalisakkanik aavernillu pisaqarsinnaanngikkaanni nerrukkaatissat pisarineqartariaqarput. Taakkualu akisupput. Ingammik qulinik imaluunniit 20-nik qimmeqaraanni.
Kalaallit Nunaanni Qimussertartut Kattuffiannit silaannaap kissatsikkiartornera nerukkaatissaaleqinerlu ikiliartornerannut pissutaaqaasorineqarput:
- Kisianni tassa ersarippoq qimmit nerisassaasa ajornarsiartorneri aammalu akittoriartorneri qaavatigullu aamma sikussaariartornera pissutigalugu qimmeeruttartut taakkua ilisimavagut. Tassa taariikkakka taakkua patsisaanersaasut ilisimavarput. Qimmip imaluunniit qimussertarnerup inuussutissarsiutit isumalluutaajunnaariartornera. Tassa tassaniippoq, Mikkel Jeremiassen oqarpoq.
Taamaattumik Kalaallit Nunaanni Qimussertartut Kattuffiata qimussertartut, takornarialersitut politikerillu decembarimi isumasioqatigiinnissamut qaaqquaat:
- Anguniarparput ajornartorsiutip qiterisaa tikillugu qaqilerisoqassasoq. Aamma kisitsisit ammut ingerlaarnerat unitsikkusupparput. Taamaammat tassa arlaatigut tigussaasumik qanoq iliortoqarsinnaaneranik naggataatigut inerniliisoqarsinnaanera angorusupparput, Mikkel Jeremiassen oqarpoq.
Naalakkersuisuni ilaasortat sisamat, Aalisarnermut piniarnermullu Naalakkersuisoq, Inuussutissarsiornermut Naalakkersuisoq, Kultureqarnermut Naalakkersuisoq kiisalu Naalakkersuisut Siulittaasuat Nunatsinni qimmit qimuttut ikiliartornerat pillugu isumasioqatigiinnissamut, Ilulissanilu ulluni 11. – 13. december ingerlanneqartussami aggersarneqartut ilagaat.
