Qimmit qimuttut Akilinermi nungusagaasimasut
Taakku angalanerminni paasiniarpaat 1950-p 1980-illu ingerlaneranni canadamiut politiivisa piliaannit naggueqatitta Inuit qimmii qimuttut nungusagaallutik ilumut toqorarneqarsimanersut, taama aviisi Globe and mail allaaserisaqarpoq.
Isumalioqatigiissitat nunaqarfimmi Baffin Islandimiittumi Kimmirut-mi tusarniaanerminni, piniartut utoqqaat qiaatigalutik oqaluttuaat tusarnaarpaat, taakku oqaluttuaraat qimusserlutik illoqarfimmut niuerniartillutik qimmitik qimuttut politiinit toqorarneqartarsimasut.
Qimmit 20.000-t tungaannut amerlassuseqartut toqutaasimanissaat ilimagineqarpoq.
Ilumoortussaq pillugu isumalioqatigiissitami siulittaasoq Madeleine Redfern oqarsimanerarneqarpoq, piniartutoqqat qimmimik taamatut ilillugit toqorarneqarsimanerat suli artorsaatigeqigamikkit iluamik oqaluusererpiarsinnaasimanngikkaat.
- Siunertarinngilarput misigisimasaat nuanniitsut qaqileqqinniarsarissagivut, qularutiginngilluinnarparali inuit taakku misigisimasatik tamakku avammut suaarutigerusoqigaat. Oqaluttuammi taakku avaanngunaqisut suli oqaluttuarinagit toqorusunngillat, taama eqqartuussisulerisoq issuarneqarpoq.
Qimmit qimuttut taamani toqorarneqarnerinut siunertaavoq naggueqatigiit inuit najukkaminniit illoqarfimmut nussorniassammata taamaalillutillu periusitoqqatik atorlugit inooriaasiat ajornarsisikkiartuaartinniarneqarsimalluni.
