Qimmit qaasussakkat inerteqqutaalernissaat Uumasut Ikinngutaannit taperserneqarpoq

Qimmit ulorianarsinnaasutut nalilerneqartut nunatsinni inerteqqutaalernissaannik Demokraatit siunnersuutaat namminermi ajunngitsoq, Susanne Markdahl isumaqarpoq.

- Amerlanertigut qimmit inuttaasa qimmiminnik perorsaanerlunnerat qimmit qaasuttunngornerinut pisuusarpoq, Susanne Markdahl oqarpoq.

Qimmit pineqartut tassalu, qimmit nukittuut unammisartutut, illuni suliffeqarfinnilluunniit paarsisutut atorneqartartut, taakku immikkut, aaliangersimalluinnartumik asannittumillu perorsagassaapput.

Demokraatit sinnerlugit inatsisartuni ilaasortap Justus Hansenip qimmit qaasussakkat, kiisalu suanngarsakkat inunnut qimminullu allanut ulorianarsinnaasut nunatsinni inerteqqutaalernissaat siunnersuutigaa.

Politimestereqarfimmiillu inatsisisatut siunnersuut suli atulinngimmat oqaaseqarfigineqarsinnaanngilaq.

Qimmillu inunnik saassussisarnerat nunatsinni takornartaanngitsoq, politimester Morten Nielsen oqarpoq.

- Qimmit qaasussakkat sorliunersut oqaatigiuminaatsippara, kisiat tassa akuttunngitsumik qimmit inunnik qimmeqatiminnilluunniit saassussisimasut suliarisarpagut. Tassa avannaani qimuttoqarfinni sineriammilu tamarmi.

Immikkut eqqaasinaavara siorna Nuummi qimmit marluk saassussisut toqutsittariaqarsimagatsigit, Morten Nielsen oqarpoq.

Danmarkimi qimmit Pitbullit Toallu inerteqqutaareersut saniatigut qimmit assigiinngitsut 12-it navianaatilittut isigineqartut nunatsinni inerteqqutaalernissaat siunnersuutigineqarpoq.

Inatsisartuni inatsisissatut siunnersuut ullumi siullermeerneqassaaq, majip 18-ani aappassaaneerneqarnissaa pilersaarutaavoq.