Qimmit perlerulersimanissaat annilaangatigineqarpoq
Narsami januaarip naajartulernerani terianniat akornanni perlerortoqalermat, maanna aamma Narsami qimmit perlerulersimanissaat politiinit ernummatigineqalerpoq.
Narsami innuttaasut ilaat ippassaq politeeqarfimmut nalunaarpoq, qimmini marluk eqqumiitsumik pissuseqalersimasut, politiillu suli qimmiutilimmut apuutinngitsut, qimmit toqusimasut Narsami politiit oqaluttuarput.
Maannakkorpiaq Narsap kommuneani sulisut qimminik perlerornissamut akiuussutissamik kapitissimanngitsunik katersuileruttorput toqoraallutillu.
Narsami innuttaasut politiinit kajumissaarneqarput, uumasuutiminnik nakkutiginnilluaqqullugit.
- qimmit eqqumiitsumik pissuseqalernissaat eqqumaffigineqartariaqarpoq, taamaattoqassappallu kommuneami tekniskforvaltningimut saaffiginnittoqartassasoq, Narsami politiini stationslederi Ib Lennert Olsen oqarpoq.
Qimmit toqusut niaqui misissugassanngorlugit danmarkimut nassiunneqarput, qaammallu ataaseq qaangiuppat paasinarsissaaq perlerortuunersut.