Qimmit pamiui Aasianni 100 koruuneqalerput
Qimmit pamiuisa akii 40 koruunimiit 100 koruunimut qaffannissaat Aasiaat Kommunalbestyrelseata akueraa. Qimmip pamiuata ataatsip akia 1988-imili qaffanneqarsimanngitsoq taamaalilluni qaffanneqartussanngorpoq.
Aasianni Kommunnalbestyrelsep apriilip ulluisa 27-ianni ataatsimiinneranit imaqarniliami pissutaasutut aamma oqaatigineqarpoq qimmeerniarnerup qimmimillu angalaannartumik toqutsisarnermi periuserineqartartut ajornaatsuinnaasannginnerat.
Assersuutitut taaneqarputtaaq qimmit pamiuisa sumiiffinni allani akii. Kangaatsiami ataaseq 100 koruuneqarpoq. Uummannaq kommunemi sulisup tiimimusiami saniatigut qimmimik pisaqarnermut 25 koruunisisarpoq. Qasigiannguit Kommuneani qimmimik toqutsinermut ataatsimut tiimimusiap saniatigut 25 koruunisisoqartarpoq.
Ilulissat Kommuneanni sulisut sulinermi nalaani qimmerniartarput imikkulli pissarsissutigineq ajorlugu.
Aasiaat Kommuneata naggataagut ilisimatitsissutigaa akuersissutillit kisimik qimmip pamiuanik aggiussigunik akilerneqarsinnaasut, ukiumullu 50-iunissaat missingersuutigineqarpoq.
