Qimmit paarinerlugaasut amerlapput
Uumasunik naalliutsitsisarneq pinngitsoorniarlugu Ilulissat Kommuniat iliuuseqarnialerpoq.
Qimmit perlersiarineqarlutik naalliutsinneqartartut amerlavallaartut, avannaani uumasut nakorsaannit oqaatigineqarpoq. Ilulissani qimmit 3000-it sinnerpaat, siornatigullu Ilulissat Kommunianni misilinneqartarsimavoq, akiliisitsilluni qimminik aasaanerani nerukkaassussisarneq.
Tamanna aallarteqqinniarlugu sulisoqassasoq, Ilulissani borgmesteri Anthon Frederiksen oqarpoq.
-Ukiut marluk matuma siorna misilillugu qimminik nerukkaassussisarneq aallartissimagaluarparput, pisariaqartitsinerli annikissimavoq. Aamma sulisussaaleqineq pissutaalluni qimminik nerukkaassussisarneq unitsissimavarput, qimminilli nerukkaassussisalernissaq aallarteqqinneqartariaqartoq paasinarpoq, Anthon Frederiksen oqarpoq.
Qimmit perlilersut qilalersullu aasaanerani takussaanerusarput. Anthon Frederiksen oqarpoq avannaani qimmiutillit tamarmik paarsinerluttutut oqaatigineqarsinnanngikkaluartut amerlavallaanik paarsinerluttoqartarnera nassuerutigineqartariaqartoq.
- Qimminik paarsilluartoqarpoq, kisianni nassuerutigisariaqarparput paarsinerluttut amerlavallaartut.
1999 aallarnerfigalugu Kredsret-mit aalajangerneqartumik Ilulissat Kommunianni qimmeqaqqusaajunnartitaasut inuit sisamaasut, Ilulissani politeeqarfimmi pisortaq Bent Heiselberg oqarpoq.
