Qimmit paaqqutarineqarnissaat qaammarsaatigineqassaaq

Ilulissani qimmit illersorneqarnissaat pillugu suleqatigiissitaq siullermeerutaasumik februaarip ulluisa 14-ianni ataatsimiippoq.

Suleqatigiiffimmi qanoq suleriuseqarnissaq eqqartorneqarpoq. Qimmit ilungersunartumik atugaqartitaanerat piffissami kingullermi saqqummiunneqartalermat suleqatigiissitaliorneq pisariaqarsimavoq.

Suleqatigiissitap siunertaraa kalaallit qimmiisa pitsaasumik illersorneqarsinnaasunillu atugaqartitaanissaasa qulakkeernissaat, Suleqatigiissitat sinnerlugit Ilulissani qimmiutilik, takornariaqarnermillu suliaqartoq, Jørgen Kristensen, allappoq.

Qimmit atugarissaarnerulernissaat qulakkeerniarlugu suleqatigiissitap anguniassat arlallit siunniuppai:

- Qimmit qanoq paaqqutarineqarnissaat qaammarsaatigalugu.

- Qimmit qimmiliviillu nakkutigineqarnerannik pisariillisaanissaq.

- Qimmit naapertuilluanngitsumik pineqartarnerat pinaveersaartillugu.

- Qimmit nerisassaanik atorluaanissaq, soorlu puisit neqaat eqqaannakkat, aalisakkat sinnikui eqqaannakkat atorluarneqarnissaat suleqatigiissitap sulissutiginiarpaa.

- Suliniutissarpassuit eqqartorneqarsinnaapput, ataaserli qularnanngilaq, tassa suliassaq annertummat kisitta saperluinnassagatsigu qimmiutillit allallu suleqataaqqullugit saaffiginnippugut, Ilulissani qimmit pitsaanerusumik atugaqartitaalernissaat anguniagaqartussaq suleqatigiissitaq sinnerlugu Jørgen Kristensen allappoq.