Qimmit aasaanerani qanoq nerukkarneqartarnissaanik isummat uumasut nakorsaata isumaqatiginngilai

- Qimmit qimuttut aasaanerani nerukkarneqarpallaartariaqannginnerinik isumaqartoqarnera eqqortuunngilaq qimmiutillillu ilaasa qimmiminnik nerisakilliortitsisarnerinik kinguneqartarluni. Qimmimmi ilaat ima nerisakitsigisarput, allaat perlerlutik toqusarlutik, tamannalu aasap ingerlanerani arlaleriarluta takuarput, uumasut nakorsaat Sanne Eline Wennerberg oqarpoq.

AAMMA ATUARUK Qimminik naalliutsitsineq nunatta isigineqarneranik innarliivoq

- Qimmit aasaanera nerisaqarpallaannginnissaannik isumaqartoqartarpoq, ilaatigut sapaatit-akunneranut pingasoriaannarluni nerukkaasoqartarluni, taakkumi nukersoratik ukiornissaa utaqqiinnarlugu pitussimasarmata. Aamma sanigorsimatillutik kiammut illersornerusinnaanerinik isumaqartoqarpoq, tamannalu pissutigalugu nerukkaatissat annikillisinneqartarlutik.
 
Taamatut isumaqartoqarnera eqqortortaqarpa?
 
- Taamaattoqanngilluinnarpoq. Qimmeq ukiorsuaq tamaat sulereerluni nukittorsaqqinnissaminut nukimmik pisariaqartitsivoq. Nukimmigut ajoqusersimasinnaanera imaaliallaannaq takuneqarsinnaanngilaq, taamaattoqartarnerali ilisimavarput, uumasut nakorsaat Sanne Eline Wennerberg taama oqarpoq.

Qimmeq ukiorsuaq tamaat sulereerluni nukittorsaqqinnissaminut nukimmik pisariaqartitsivoq.

Qimmiutillillu kaammattorusuppai qimmiminnik nerukkaalluartaqqullugit, aamma aasaanerani.

- Aasaanerani nerukkaavallaartoqannginnissaanik isumaqarneq, uumasut nakorsaata isaanit isigalugu paatsuuinertut taasariaqarpoq. Qimmip sulerinera najoqqutaralugu soorunami aamma nerukkaasoqassaaq. Aamma puallarsiinnarneqassanngilaq, ukiulli qaangerluarnissaanut meqqumilu taarsernissaannut ukioqqinnissaanullu nukissaqarluartariaqarpoq.

AAMMA ATUARUK Uumasut nakorsaat: Sanilivit qimmia naalliuttoq naammattoorukku siarngutigissavat

Aasaaneranimi aalisarnissamut puisinniarnissamullu periarfissaqarluarpoq, taamaakkaluartoq aamma qimminut nerukkaatissanut akissaaruttoqartarsinnaavoq, taamaalisoqarneranili qimmit perlersiarineqartussaanngillat, uumasut nakorsaat nassuiaavoq.
 
- Aningaasatigut ajornartorsioraanni, taava qimmiutit allamut tunniunneqarsinnaapput imaluunniit toqutsiinnarlugit. Qimmit pitussimatillugit naalliutsinneqarnerinut aningaasaqarnerup tunngavilersuutiginissaa akuersaarneqarsinnaanngilluinnarpoq.

AAMMA ATUARUK Qimmit perlertut 19-it Ilulissani toqunneqartut