Politiit qimmii ukimut ataasiarlutik naapinnerminni misilitsillutillu sungiusartartut, politiassistent Bjørn Bjerregaard oqarpoq
Qimmit politiini sulisussat, nalaatsornerinnakkut qinerneqarneq ajorput.
- Qimmit ukiup affaanik utoqqaatigilereersimasut Danmarkimiit tikisittarpavut. Tamanna sioqqullugu qimmit tarnikkut pissusaat, timikkullu inerisimassusaat misilerarneqaqqaartarput. Aamma qunutuujunersut sanngiitsuunersulluunniit misilinneqaqqaartarput. Sungiusarnerallu tassanngaaniit politeeq peqatigalugu nanginneqartarpoq, Bjørn Bjerregaard oqarpoq.
Politiit sulinerminni qimmit sakkutut pingaaruteqarluinnartutut atugaraat, taakkulu inuttulli sulilluassagunik sungiusartuartariaqarput.
- Qimmit massakkut aqqaniliupput, taakkunani Labradorit pingasut ikiaroornartulerisut kiisalu schæferit arfineq-pingasut ujaasinernut, tigusarinninnernut, sakkunik ujaasinernut aamma hashinik ujaasinernut ikiortigineqartartut, Bjørn Bjerregaard oqarpoq.
Qimmit sungiusarnerat Nuummi sapaatit akunneri marluk ingerlanneqassaaq.