Qimmit aamma kræftertarput

Qimmit aamma inuttuulli kræftimik nappaateqalersarput. Qimmit atorlugit nappaassuaq kræfti pillugu siunissami paasinninnerusinnaanersugut uumasut nakorsaatut ilinniartup danskiusup misissuiffiginiarlugu aalajangerpoq.

Qimmit inuillu ikinngutiginerpaasarpaat, ikinngutigiinnerpaallu imminnut ikiortarput. Taanna aallaavigalugu uumasut nakorsaatut ilinniartoq Louise Brønden misissuerusulerpoq:

Qimmit uatsitulli utoqqaatigilerneq ajoraluarlutik aamma kræftimik nappaateqalersarput. Qimmit inunnit inuunikinnerusartut malinnaaffigalugit kræftip paasiuminaatsortai misissorneqalerpoq.

- Qimmit najugaqartigisarpagut, nereqatigisarpagut avatangiisinilu qanimut ingerlaqatigisarlugit. Qimmit avatangiisiminnik uatsitulli sunnertittarput. Uatsinnillu siulliungaatsiarlutik kræftimik nappaateqalersarlutik, Louise Brønden oqarpoq.

Uumasut nakorsaat qimmimik kræftimik nappaatilimmik naammattuisut allattuisarnerat Louise Brøndenip suliniutigereerpaa.

Louise Brønden paasissutissanik taakkunannga misissuiniarpoq: kræfti sorleq qimmit nappaatigilersimaneraat, qimmeq qanorittuunersoq, sumi inuunersoq kiisalu qanoq utoqqaatigaluni kræftimik nappaateqalersimanersoq misissorniarpaa. Misissuinermilu kingorna paasissutissat kikkunnut tamanut – qimminut allaat – iluaqutaasinnaassasut neriuutigaa.

- Kræfti sorleq nappaatigineqalersinnaanersoq eqqoriaasinnaanngussagutta kræftertoqalinnginermi pinaveersaartitsinerput aallartissinnaavarput imaluuniit nakorsaariaatsit sorliit atorneqassanersut pilersaarusiorsinnaavugut, Louise Brønden oqarpoq.

Danmarkimi uumasut nakorsai 30-t massakkorpiaq qimmimik kræftertumik naammattuuigaangamik Louise Brøndenimut nalunaartarput. Amerlanerusulli nalunaartalernissaat Louise Brøndenip kissaatigaa.

Maani nunatsinni nuna tamakkerlugu Neriuffik sapaatiuppat katersuiniarniarpoq.