Qimmit 100-ut toqorarneqartut
Naammagittaalliortut ajornartorsiutaanerarpaat, qimmit, Howling Dog Tours Inc-mit pigineqartut, siunertaagaluartutut imminut akilersinnaanngimmata toqorarneqarneri.
- Inuiaqatigiinnit akuersaarneqarsinnaanera upperinngilara, uumasut - ingammik qimmit qimuttut - toqorarneqartassappata, sakaluutaannartut isigineqarneri piinnarlugit, Vancouver Humane Society-mit Debra Probert oqarpoq.
Taassuma aamma oqaatigaa, qimminik qimuttunik atortoqarlutik iluanaarniartut niuerfigineqartannginnissaannik kaammattuuteqarniarluni.
Qimminik toqoraasimaneq paasineqarpoq, sulisut ilaasa, toqoraanermi kingorna uippakajaarujussualersimanermilu kingorna sulisitsisuminut taarsiiffigeqqulluni piumasaqarmat. Taassuma oqaatigaa qimmerparssuit aallaallugit imaluunniit qungasiarlugit toqoraareernermi kingorna uippakajaarujussualersimalluni.
Tamanna ilisimaneqalermat, sulisitsisoq oqarpoq, qimmit toqunneqartut tassaasut utoqqaat napparsimasullu.
Pisoq inuppassuarnik akerliuffigineqalerpoq, taakkulu isumaqarput taama toqoraasarneq takornartaanngitsoq aammalu nakkutigineqanngitsumik taama iliortoqartartoq, danskit aviisiat Ekstrabladet allappoq.
Qimmit qimuttut 100-it toqorarneqarnerinut atatillugu eqqartuussivilersuussisoqassanersoq suli nalunarallarpoq. Canadami uumasuutinik toqutsisarneq inatsisitigut inerteqqutaanngilaq, illuatungaatigulli inerteqqutaalluni uumasunik naalliutitsisarneq. Aamma maani Nunatsinni uumasuutinik toqutsisarneq inatsisitigut inerteqqutigineqanngilaq.
