Qimminit kiitittoq
Sapaammi qimussit aqqutaatigut pisuttuarujoorneq arnamut Aasiammiumut sapaat februaarip 26-at sakkortuumik pisoqarfiuvoq. Arnat qimminit arlalinnit upanneqarpoq nissumigullu arlaleriarluni kiitilluni.
Politiit nalunaarput qimmit upannittut maanna toqorarneqartussanngortut.
Tamatuma kingorna aamma paasineqarpoq qimmit upannittut perlerornermut akiuussutissalerneqarsimanngitsut, naak inatsisit tunngavigalugit piginnittup qimmit akiuussutissalerneqarsimanissaat pisussaaffigigaluaraa.
Maanna arnaq sivisuumik perlerortoqarsinnaaneranut nakorsarneqartussanngorpoq.
Inatsisit malillugit qimmit qimuttut sisamanik arfinilinnilluunniit qaammateqalernerminni perlerornermut akiuussutissinneqartussaapput ukiullu pingasukkaarlugit kapineqartartussaallutik kommunep akiuussutissanik kapuisartuanut saaffinninnikkut.
- Akiuussutissaliineq pingaartorujuuvoq. Perlerorneq nappaataavoq inunnut uumasunullu uloriarnartorujussuaq - taamaammat qimmiutillit kajumissaarusuppakka akisussaaffik tamanna eqqummaffiginiaqqullugu, nersutit nakorsaanerat Sanne E. Wennerberg oqarpoq.
