Qimminik paarsineq pillugu pilersaarusiaqarpa?
Inatsisartuni ilaasortaq Siumumeersoq Jørgen Wæver Johansen, Avannaani qimmeqarfiusuni qimmit paarinerlutat pillugit, Inatsisartut suleriaasianni § 36 naapertorlugu Naalakkersuisunut apeqquteqarpoq apeqquteqaataalu akineqarpoq.
Qimminik paarsineq pillugu Jørgen Wæver Johansen arlalinnik apeqquteqarpoq.
- Naalakkersuisut ajornartorsiut qaangerniarlugu qanoq iliuuseqarnissamik pilersaarusiulersaarpat?
Aamma: Taamaassimappat suut iliuusissat pilersaarutaappat? Jørgen Wæver Johansen aperaaq, ajornartorsiutillu qanoq qaangerneqarnissaanik Naalakkersuisut eqqarsaasersorsimasut Inuussutissarsiornermut Naalakkersuisoq Sivert K. Heilmann akissuteqarpoq.
- Iliuuseqarnissamut pilersaarummi siunniunneqarpoq paasissutissiisoqassasoq sumiiffinnilu pimoorussisoqassaaq, qitiusumit tapersersorneqartumik. Iliuuseqarnissamut pilersaarutip iluatsitsinissaanut pingaaruteqarpoq ajornartorsiutit aaqqiiffiginiarnerini sumiiffinni nukiit pimoorussillutik peqataanissaat. Sivert K. Heilmann akissummini allappoq. Kommunit, Qimussiussisartut peqatigiiffiat KNAPK-lu ajornartorsiutit aaqqiiffiginiarnerini peqataatinniarlugit attavigineqassasut, Sivert K. Heilmann aamma allappoq. Qimmeqarnermut atatillugu aaqqiissutissanik suliniuteqarnissaq anguniarlugu Pisortaqarfik KANUKOKA-mik piaarnerpaamik ataatsimeeqateqassasoq aamma erseqqissaatigaa.
- Uumasut nakorsaat peqataassapput inatsisit, nappaatit, nerisitsisarneq qimmillu atugarissaannissaannut tunngasunik eqqartuissallutik. Pisortaqarfik neriuppoq ataatsimiinnerit taakku annertuumik peqataaffigineqartassasut. Sivert K. Heilmann allappoq.
Qimmillit pikkorissartitsisoqarnissaat siunniunneqanngilaq, tamannali kissaatigineqarpat naammassiniarneqarumaartoq, naalakkersuisuni ilaasortaq allappoq.
Jørgen Wæver Johansenip Avannaani qimuttunik qimmeqarfinni qimmiuteqarnissamut akuersissummik peqarnissamik siunissami piumasaqaateqalersaartoqarnersoq aamma paaserusuppaa,tassanilu qimmiuteqarnissamut akuersissuteqartarneq atulersinneqasanersoq kommunalbestyrelsit aalajangertussaagaat Sivert K. Heilmann allappoq.
